NAILHAN ra ang babaye nga gi hit-and-run niadtong Agusto 5, alas 8 sa gabii sa Barangay Logilo, Alubijid, Misamis Oriental.
Giila ang biktima sa iyang pamilya nga mao si Bridget Sandoval, 26, lumad nga taga Iligan City.
Ang igsuon sa biktima nisulti sa SunStar Superbalita nga dunay duha ka gagmay’ng bata ang biktima, ug nagkabulag kini sa bana mga usa ka tuig human dunay lain ang bana niini.
Gikasakit og maayo niini ug bag-o lang namatikdan sa pamilya nga wala na sa insaktong pangisip.
Unang higayon nga naglakaw-lakaw kini ug niabot sa lungsod sa Alubijid.
Sa imbestigasyon sa kapolisan, nasuta nga mitabok kini sa kalsada ug naligsan sa giingong usa ka Toyota Fortuner.
Imbes maghunong ang driver, misibat pakusog og dagan paingon ang direksyon sa dakbayan sa Cagayan de Oro.
Gipangita pa kini sa iyang pamilya sulod sa pila ka adlaw, samtang ang Alubijid Police Station, sa pagpangulo ni Police Captain Lister Lofranco, nag-post sa hulagway niini sa Facebook.
Gikuha kini sa Superbalita ug gi share sa mga followers. Pila ka minuto ang nilabay, nagpadala og mensahe ang igsuon sa biktima ug gi kumpirma niina nga ilang sakop ang babaye.
Sa pagkakaron, ang patay’ng lawas nga anaa gidala sa Agrida Funeral Homes ang gi claim na sa pamilya.