TULO na ka gabiing way tarong nga pahuway ang 370 ka mga tawo nga nadakpan sulod sa buwangan sa Barangay Ibabao-Estancia, Dakbayan sa Mandaue human wa sila makapyansa sa Miyerkules, Agusto 7, 2019.
Napasaka na ang kaso may kalapasan sa Presidential Decree 449 kun Cockfighting Law of 1974 batok sa mga sabongero ug empleyado sa D and C Coliseum nga gironda sa mga sakop sa Criminal Investigation and Detection Group 7 (CIDG) 7.
Tungod sa ilang kadaghan, nigamit ang kapulisan sa tulo ka mga Ceres bus aron ihatod sila sa Hall of Justice sa Dakbayan sa Mandaue.
Gitagsa-tagsa sila sa pagpa-atubang sa mga piskal sa Siyudad aron kuhaon ang information sa kaso nga gisang-at sa CIDG 7 batok kanila.
Tungod sa ilang kadaghan, napupos ang oras hinungdan nga karong adlawa na sila tugtang makapyansa.
Matod ni Police Major Edwin Lacostales, hepe sa CIDG Unit Mandaue City nga ang mga sabongero lang una ang ilang pasakaan og kaso.
Iyang gipasabot nga wa pa sila makakita sa business permit sa sabongan kon kinsa ang nanag iya niini.
Sa iyang nahibaw-an, korporasyon ang buwangan diin daghan ang mga tag-iya nga maoy sunod nila nga subayon.
Ang buwangan gipanag-iya sa pamilyang Cortes, apan si Mayor Jonas Cortes wa na manginlabot niini sukad siya napiling public official, labina na dihang siya napili nga mayor.
“Hindi kasali ang mayor sa kaso kasi hindi ko pa nakikita yung mga permit nila eh. Yun lang muna ang ma i-file namin kasi di pa namin maasikaso yung iba. If the evidence warrants, pwede naman makasama sa kaso yung may ari ng cockpit. Ang alam ko, corporation yan eh. Kung corporation, marami yan. Tingnan natin kung sino talaga ang mga owner kaya di pa natin ma point kasi wala pang ebedensya pa,” matod ni Lacostales.
Nangasaba
Asawa sa usa sa mga nadakpan nga di gustong nganlan, nibasol sa iyang bana sa hitabo.
Iyang gikasab-an ang iyang bana nga iyang giapas sa Camp Sotero Cabahug sa Gorordo avenue.
“Ako giingnan gahi man gud kag ulo! Giingnan ayaw nag panugal! Dakpan noon...Dili man gud ka maminaw sa imong anak,” matod sa asawa sa interbyu sa Superbalita Cebu.
Laing asawa nga di sab magpahingan, niingon nga namakak ang iyang bana kaniya.
Nagpatuo kining nipalit og pagkaon, apan napugos sa pagtug-an human kini gidala sa CIDG 7 headquaters.
Laing asawa niingon nga ang ilang anak nauwaw og maayo sa gidangan sa amahan.
Si Timmy, di tinuod nga ngan, niingon nga molayat na unta siya sa atop sa buwangan, apan nabalaka siyang mapiang.
“Kuyaw kong manglayat. Kuyaw og mabali-an pa hinuon kay ang kwarta makit-an ra kay sa manglayat unya magkiang-kiang na kay nabali-an,” matod ni Timmy.
Makatabang
Si Rogelio “Eliot” Vasquez, presidente sa mga gaffer kun tigtaod og buwang sa D & C Coliseum nga dunay 12 ka mga miyembro, nakatabang og dako kanila ang buwangan. Matod ni Vasquez nga dunay nakapahuman og college sa ilang mga anak tungod sa kita sa buwangan.