NAILOG sa Barangay Gusa ang titulong Outstanding Lupon Tagapamayapa human kini ang nakasakmit sa maong award.
Nasayran nga nakuha sa maong barangay ang award gikan sa Hall of Famer nga mao ang Barangay Kauswagan sa deperensiya lamang nga .08 ning tuiga.
Atol sa flag raising ceremony sa City hall, gipanganlan sa tinugyanan sa Department of Interior and Local Government (DILG)-Northern Mindanao ang outstanding Lupon sa 12 ka mga barangay.
Nasakmit ang ika-11 nga pwesto sa Barangay Bayabas; ika-10, Tablon; ika-9, Agusan; ika-8, Balulang; ika-7, Bonbon; ika-6, Bayanga; ika-5 Patag; ika-4, Nazareth; ika-3, Camaman-an; ika-2 Canitoan; ug ika-1 ang Gusa.
Gidayeg ni Mayor Oscar Moreno ang tanang mga barangay, ilabi na sa pagresolba sa mga panagbangi ug isyu diha pa lang sa kabarangayan.
“Ang importante is maayo ang atong lakaw. To me, that’s the most important thing nga atong tahas, atong mandato atong nahimo,” matud ni Moreno.
Gidugang pa nga ang importante gihimo ang tanan, ug naresolbar ang mga isyu, ug panagbangi diha pa lang sa barangay nga bahin.
Gidasig usab ni Moreno ang tanang kabarangayan nga mopartisipar ug gani gikan sa top 12 buot niini nga himuong top 20.
Buot usab niini nga patas-an pa ang premyo nga, kung mahimo, patas-an sa usa ka milyon ang budget aron gayud madasig ug mahagit ang ubang mga Barangay nga mas palig-unon ug palambuon ang ilang Lupon Tagapamayapa sa matag barangay.
“Kung mahimo atong dugangan ang award kung mahimo top 20,” matud ni Moreno.
Gidugang pa nga para gyud mahagit ug ma-engganyo ang uban.
“And then atong dako-dakoan gamay ang consolation prizes. Karon, ang budget is P640,000. Let’s make it at least P800,000. Kung mahimo, P1 million,” ingon ni Moreno.
Nasayran nga nakadawat og salaping cash ang matag barangay nga naapil sa top 12, lakip na plaque. Samtang pinakadakong kantidad nga anaa sa P110,000 ang nadawatan sa Barangay Gusa nga maoy namahimong mananaog.