USA ka gasoline station sa lungsod sa Minglanilla ang gilungkab ug gikawatan, ala 1:40 sa Huwebes kaadlawon, Agusto 8.
Ang guwardiya gidis-armahan pa ug lakip pa sa gikuha sa mga kawatan ang memory card sa Closed Circuit Television (CCTV).
Nakuha gyud ang halin sa tibuok Myerkules, Agusto 7, nga kita nga gibanabana mobalor og dili mominus sa P100,000.
Nahitabo kini diha sa Petron gasoline station sa sitio Puntod, Barangay Calajoan, lungsod sa Minglanilla.
Matud ni Police Master Sergeant Junyl Ater sa Minglanilla Police station nga saysay sa stay-in security guard sa Petron Gasoline station nga kutob ra alas 11 sa gabii abri ang gasolinahan.
Apan pasado ala una kagahapon sa kaadlawon, Agusto 8, tulo ka mga lalaki nga luwan og usa ka motorsiklo ang ningtulis kanila.
Matud sa guwardya nga si Robert Dela Cruz, 2, lumad nga taga Zamboanga Sibugay, stay-in sa kompaniya, nga nihunong ang motorsiklo nga gisakyan sa tulo ka mga lalaki, sa may air compressor nga dapit sa gasolinahan kay aron kunohay magpahangin.
Gibalibaran niya kay gawas nga sirado na sila, dili usab siya kahibalo mo-operate sa pahanginan.
Giingong’ nikanaug ang duha ka backrider ug ang usa nagkurikuri sa motorsiklo.
Apan kalit lang nga nibunot sa ilang tagsa ka armas ang duha ka backrider dayon tion ngadto sa gwardiya.
Gikuha ang iyang issued firearm nga .38 caliber revolver, dayon gisumbag kini sa makadaghan nga higayon.
Giingong’ gibakliad pa siya ug gibaatan ang iyang kamot sa likud.
Giransak pag-una ang cashier sa tunga-tunga sa gasolinahan, apan giingon nga walay nakuha hinungdan nga gisunod ang convenient store.
Dinhi na nakuha ang usa ka gatus ka libu ka pesos nga halin sa gasolinahan.
“Na-(caught) off-guard ko, kay naka ready na ilang armas. Modagan unta ko, giingnan ko, ‘dagan kay patay gyud ka’ mosulay kog shagit, sumbagon ko,” saysay pa ni Dela Cruz sa Superbalita Cebu.
Gisubay sa kapulisan kon aduna bay mga CCTV sa mga silingang establisemento.
Susihon usab sa Minglanilla Police kon aduna bay inside job ug uban pa nga anggulo sa krimen. (FMD)