ANG atong mga Constitutional Father milatid: “Philippines is a Democratic and a Republican State, Sovereignty resides in the people and all government authority emanates from them”. Kini testamento ug pag-ila sa katawhan nga maoy tinud-anay nga tinubdan sa gahom ug awtoridad sa kagamhanan.
Apan dili lang ang awtoridad sa gobyerno ang anaa nagasukad sa matag usa sa atong katawhan, nahilakip usab niini ang gitawag og nasudnong kalambuan ug tingusbawan. Kay sa kahimtang karon sa atong ekonomiya diin maoy punay nga ipatuo sa administrasyon ni Presidente Gloria Macapagal Arroyo ang pag-asenso kintahay sa atong ekonomiya taliwa sa global crisis pinasikad sa atong misaka nga GDP kun gross domestic product. Apan kining matanga sa kalambuan kutob ra man mopatambok sa bulsa sa mga adunahan nga mga negusyanteng magpapatigayon ug dili na modagayday sa sector sa mga mamumuo ug trabahante nga maoy naglangkob sa kinabag-ang hut-ong sa atong katilingban.
Ang unequal distribution of wealth nga gihalingan sa kahakog sa salapi ug gahom sa atong mga nangatungdanan sa gobyerno, maoy nag-unang hinungdan sa wala pag-asenso sa mga Pilipino, bisan pa man og kita ang labing una nga Republika sa Asya. Kini tungod kay maoy gihuna-huna lamang ang personal nga ganansya ug pagpaburot sa kaugalingong bulsa. Bahala na ang isigka-Pilipino sa pagluwas sa iyang kaugalingon ug sa iyang pamilya.
Sa kadaghang nanggawas karon nga mga party-list nga lupig pay uhong sa pagpanglipang, natawag akong atensyon ning mithi ug kawsang gibarugan sa KASANGGA SA KAUNLARAN PARTY LIST diin sa ilang pagbisita sa DYRF Radyo Fuerza, 1215 KHZ AM. Ilang gipasabot ang tuyo sa paghatag og igong ayuda sa mga yano ug pobreng mga Pinoy nga makasugod ug molambo sa kaugalingong ginagmay nga negusyo nga sarang kapanginabuhian sa ilang pamilya aron sila mamahimong produktibong miyembro sa nasudnong ekonomiya. Dungan usab dinhi ang pagpasabot nga ang pagnegusyo dili lamang anaa sa pagpangitag dakong ganansya kon dili nahilakip usab niini ang responsibilidad sa maisigka-Pilipino.
Gawas sa programa sa micro-lending, tuyo usab nilang mapalapdan pa ang programa sa pabahay, scholarships ug community building nga nasugdan na sa ubang bahin sa nasod sama sa Metro Manila, Quezon City, Albay, Camarines Sur, Cavite, Rizal, Guimaras, Benguet, ug Misamis Occidental. Kini tungod kay naumol man matod pa kining maong kahugpongan sa pagpaningkamot sa mga nagpakabanang negusyante, professionals og ehekutibo nga nagtuo nga walay mahitabo ning atong nasudnong problema sa kawad-on kon dili molihok ug magtibangay ang matag usa.
Mao nga imbis magpunay sa paghangad ug pagyampungad sa nasyunal nga kagamhanan nga maoy mohatag og kaayuhan nga sa pila na ka nanglabayng henerasyon nagpabiling napamatud-ang walay katumanan.
Maoy ugmaron ang tagsa-tagsa ka mga kabos nga mga pamilya aron nga sila makasabot nga ang ilang pagkahaw-as sa ilang kalisdanan anaa sa ilang kaugalingong paningkamot.
Kining maong “bottoms up approach” nga gipasiugdahan sa Kasangga sa Kaunlaran Partylist mahisusama sa paglaom taliwala sa kalisdanan sa atong katawhan. Uban ang tinguha nga mapalambo ang nasod nga Pilipinhon pinaagi sa pagsugod sa pagpalambo sa atong matag kaugalingon.