DAGHANG mga katarungan nga nitumaw niining balaod nga gipangamahan ni Kongresista Tony Cuenco sa paghulma sa bag-ong barangay nga Englis-Banawa.
Ang kapitan sa Guadalupe, nga bata-bata sa mayor, supak nga buk-on ang Guadalupe.
Ang iyang gusto, sama sa gusto ni Cebu City Mayor Tommy Osmeña, mao nga buk-on ang Guadalupe og katulo.
***
Sukwahi kini sa pasiaw nga naghisgot niadtong nipalit og pizza Sa dihang gipangutana siya kon kapila hiwaa ang pizza, niingon siya nga kaupat lang kay di niya mahurot ang walo.
Way nagpugong sa kapitan sa Guadalupe ug sa mayor sa syudad kon unsay ilang ghusto. Kon mahinayon ang pagkabuak sa Guadalupe, way makapugong sa mga opisyales sa syudad sa paghimo og laing barangay.
***
Daghan ang nahimuot sa dihang nipahibawo si Mayor Tommy Osmeña nga dunay P3 bilyunes nga surplus ang panudlanan sa dakbayan.
Panagsa ra ning mahitabo. Lahi ra gyud kon duna tay mayor nga maayo sa real estate.
***
Nakahinumdom tingali mo niadtong usa ka piloto sa Estados Unidos nga nibangga sa iyang eroplano sa building sa Internal Revenue Service kay wa makauyon sa gipaningil nga buhis.
Ang syudad sa Sugbo naningil sab og buhis sa mga negusyante sa syudad, lakip na ang University of the Visayas nga usa ka non-stock, non-profit corporation.
Maayo tingaking tan-awon sa Cebu City Hall kon wa bay eroplano ang mga Gullas.
***
Gi-deliver na ang kapin sa 82,000 ka mga optical scanner ngadto sa Commission on Elections (Comelec) nga gamiton sa umaabot nga piniliay sa Mayo.
Daghan gihapon ang wa mosalig sa Comelec.
Ang akong pangutana mao, kon modaog sila, nagpasabot ba nga sila maoy nanikas?
***
Gihulga kita sa mga katalagman. Duna say warning sa tsunami.
Dunay nasuko kay wa madayon. Ang ato mao ang pagpangandam. Pero malipay kita kon di madayon. Sama sa pagpili sa usa ka presidente nga way gikabangkaagan.