NIBALIK sa daan nga format ang Cebu Popular Music Festival sa ika-40 na niini ka tuig.
Wa nay category ug genre kay bisan unsa ang tema, mopili og usa ra ang grand winner.
‘Ipadayag ang gibati’ gamita ang pinulongang Binisaya.
Makuha ang entry form ug guidelines sa cebupopmusic@gmail.com, samtan sa Agosto 31, 2019 ang deadline. Lihok na!
•••
Nakadayeg ko niadto ni Julia Barretto dihang niangkon kini nga sila na si Joshua Garcia.
Nakaingon ko nga lahi siya sa ubang artista nga bisan dugay nang nakauyab, pagorya-gorya gihapon kon pangutan-on.
Karon nga gikatahong nalambigit siya sa kanhi relasyon ni Bea Alonzo ug Gerald Anderson, wa pa ko nakadungog og pahayag ni Julia.
Nag-usab kaha siya sa iyang diskarte o wa lang gyud ko na-inform? Haha! Feeling!
•••
Anugon nga wa magdugay ang pagsalida sa Family History nila ni Michael V, Dawn Zulueta, Miguel Tanfelix ug Bianca Umali.
Nindot ang pagkahimo ug nindot sab ang istorya.
Isnabero ba ang mga maki-sine o may kulang ang pagpagarpar sa pelikula?
•••
Nakadayeg ko sa kamaayo manubag nila ni Nadine Lustre ug Sam Concepcion sa presscon sa Indak niadtong Martes didto sa Parklane Hotel.
Mas articulate si Sam, gisalida na ang Indak sugod niadtong Miyerkules, Agosto 7.
Taga Bantayan ang character ni Nadine ug may mga linya siya nga Binisaya, duna lay mga linya nga kiwaw pagkasulat.
Gisayangan ko kay wa kaayo mapakita ang mga nindot nga talan-awon sa isla ug lungsod.
Human modaog pagka best actress, iya lang kunong gisunod ang iyang kasingkasing sa pagdawat og mga proyekto.
Bisan kon ‘risky,’ nitug-an si Sam nga exciting ug interesting ilabina alang niadtong wa pa nakakita og dance movie.
Nahinugon unta si Nadine sa offer alang sa Metro Manila Film Festival pero niangkon siya nga gikinahanglan niya nga mo-relax human sa duha ka proyekto (Ulan ang una) ug ang Jadine concert sa ABS-CBN.
•••
Dungan nga nanamilit ang mga parokyano sa artsidyosesis sa Cebu sa ilang mga pari sa pagbalhin sa ilang mga kura paroko ug mga kaabag niini.
Tungod kay nasuod ko sa among pari sama sa mga nangagi kay lagi tig-abag man pod ko sa mga kalihukan sa simbahan, akong gituyo nga wa motambong sa pagpagikan niya ug sa pagsugat sa bag-ong pari. Kapoy!
God bless everyone!