KON ang isla sa Bantayan, Sugbo adunay Camp Sawi, adunay ika-atbang ang isla sa Camotes, Sugbo sa ilang Camp Wagi.
Sa maong dapit imong masinate ang ka presko sa hangin dunganan sa pag-enjoy sa maanindot nga talan-awon sa palibot.
Bag-o lang nag usa ka tuig niadtong Hunyo 18, 2019 ang resort, sa dihang gi-ablihan sa publiko ang kanhi bakasyonan sa pamilya ni Sonia Cotanda sa Barangay Unidos, lungsod sa San Francisco, isla sa Camotes.
Gisugdan ang pag-ugmad sa dapit niadtong 2016 isip kalingawan ug bakasyonan sa ilang pamilya nga adunay duha pa lang ang lawak.
Ang resort dunay kinatibuk-ang gilapdon nga 2,200 metro kwadrado nga luna (dry area) ug nag-apply sila og permit alang sa 1,500 metro kwadrado sa mangroves area.
Karon, ang lugar nabantog na nga Unidos Mangroves Garden and Resort nga gidumala nila ni Cotanda.
Aduna na kiniy duha ka payag ug tulo ka lawak ug hayan sa sunod semana, ablihan ang barkada room.
Unsay naka-espesyal sa resort?
“It’s a resort of nature garden and landscaping. Some other resorts sa Camotes kay walay nature garden,” nagkanayon si Cotanda dihang nahinabi sa Superbalita Cebu.
Kon walk-in ang mga bisita, P20 ang entrance fee sa mga hamtong samtang P10 sa mga bata.
Sa pagsud sa resort, mosugat sa imong panan-aw ang swimming pool nga adunay bayad nga P100 alang sa regular samtang P50 kon bata nga nagpanuigon og 10 anyos paubos.
May discount alang sa mga senior citizen.
Statued mini safari animals
Sa resort, pambato ang pang-Instagram pose uban ang 13 ka mga estatuwa sa mga mananap nga ang uban makit-an sa safari.
Naglakip kini sa gorilla, dinosaur, deer, giraffe, camel, tiger, lion, bitin, zebra, Dalmatian dogs, mga langgam, isda ug sea horses, gawas pa niini may buhi sad nga love birds.
Boardwalk
Gawas sa presko ug bugnaw nga hangin, atraksyon usab sa resort ang 100 metros nga gitas-on sa konkretong boardwalk paingon ngadto sa mga bakhaw o mangroves.
Sa ganghaan, dunay mosugat nimo nga signage nga Camp Wagi.
Samtang naglakaw ka sa boardwalk, makita nimo ang scenic view sa sanctuary.
Kon taob, mahimo ka nga mamingwit og isda sa boardwalk dunganan sa mga huni sa lain-laing klase sa lokal nga mga langgam sama sa tikarol.
Mahimo usab nimo ma-explore ang tanaman sa mangroves pinaagi sa kayaking kuyog ang usa ka kauban o partner sa kinabuhi nga P100 ang bayad matag oras.
Sigun pa ni Cotanda moabot sa 20 ka species sa mangroves ang makita sa lugar.
Siya nidugang ang Barangay Unidos ang dunay labing dako nga kabakhawan sa lungsod nga protektado sa Department of Environment and Natural Resources.
Sa tumoy sa boardwalk, makita ang maanindot nga view sa dagat ug lapad nga tanaman sa mga bakhaw. Adunay estatuwa sa higanteng sea horse.
Aduna usab waiting area diin mahimo molingkod ug mopahuway samtang nag-enjoy sa nindot nga talan-awon.
Room accommodation
Adunay tulo ka lawak nga de aircon sa tag P1,500 (overnight) alang sa duha ka mga tawo nga dunay libreng pamahaw, mahimo kadungagan og tawo apan may bayad nga P150 apan wa nay labot sa libreng pamahaw.
Duha ka kubo o payag nga de aircon sa tag P1,000 matag usa alang sa tulo ka mga tawo. Way libre nga pamahaw.
Sa sunod semana, ablihan sa resort ang barkada room alang sa dinaghan nga mga bisita nga P3,500 ang overnight stay diin masud ang walo ka mga tawo apan without breakfast.
Lamian ug affordable nga pagkaon
Moluto og pamahaw ang resort sa tag P75 nga silog pinaagi sa iyang Aya-ay Café.
Mo-serve usab sila og tinolang isda, bam-i, chopsuey, ug tinolang manok nga pulos tag P75 ang matag serving.
Mahimo usab magpaluto og squid adobo ug shrimp guisado sa tag P120 matag serving.
Si Cotando nitug-an dugang pagpalambo ang ilang himuon sa resort diin nagplano sila mag-culture og alimango ug magbuhi og tilapia niini.
Unsaon pag-adto?
Daghang kapilian sa pagpaingon sa maong dapit kay mamahimong mosakay og barko sa pantalan sa siyudad sa Danao, P200 ang pleti (kon wa mausab ang rate).
Pwede sab mosakay og Ocean Jet sa Pier Uno sa dakbayan sa Sugbo, P500 ang pleti nga modunggo sa pantalan sa lungsod sa Poro.
Pahatod sa drayber og habalhabal paingon sa Brgy. Unidos, San Francisco sa P250-P300 ang pleti matag tawo o depende sa sabot sa drayber.
Samtang alang niadtong usa ka pamilya o dinaghan nga tawo mamahimo makigsabot og multicab nga ikontrata aron mohatod sa maong destinasyon or abangan aron sab modala ninyo sa inyong pagsuroy sa nagkadaiyang dapit sa isla sa Camotes.