KASINGKASING sa usa ka warrior ang gipakita ni Allan Albindo aron masugakod ang kalisdanan sa sayong bahin ug malampuson nga mipaundang sa Malaysiano nga si Arif Izzudin sa ikatulong round sa undercard sa ONE Warrior Series (OWS) 7 niadtong Martes, Agusto 6, didto sa Singapore.
Gidominar sa Malaysian ang first round diin iyang natumba si Albindo kinsa nakabaton og dakong pagpanghudlat sa dihang na-choke kini sa maong round. Apan bisan pa man og naapikihan, wa mosurender ang lumad nga taga Argao Sugbo nga nakakita siya og paagi aron malikayan ang kapildihan.
Sa third round, sa dihang natumba ang Malaysiano sa corner, wala na kini lung-i pa ni Albindo sa pagpauwan sa iyang mga kinumo hinungdan nga mi-intervene ang referee ug mipaundang ni Izzudin.
“Naglisod gyud ko niya sa sinugdanan. Ingon ani gyud ning MMA. Dili ka kahibawo unsay mahitabo sa away. Naninguha gyud siya nga iya kong makuha sa rear-naked choke. Mao nga nag adjust ko sa sunod nga mga round ug dinhi nakapabuhagay kog mga body shots,” matod ni Albindo sa Sun.Star Cebu.
Si Albindo, kinsa ubos sa pagdumala ni Master Benigno “Ekin” Caniga sa Yaw-Yan Ardigma-Cebu, mahilakip na sa MMA reality series ug makapirma na usab siya og kontrata nga mobalor $100,000 sa ONE - Championship. (EKA, JBM)