Pacquiao dili na gyud ni Thurman

DAW og sa giyam-iran sa kampo ni Manny Pacquiao ang hagit nila ni Keith Thurman ug Jeff Horn nga makig-rematch kaniya.

Lakip na usab sa wa nila panumbalinga mao ang tinguha ni kanhi world champion Marcos Maidana, kinsa ni-retire na sud sa lima ka tuig, nga makigsangka sa fighting senator.

Gipadayag ni Sean Gibbons, ang pangabaga ni Pacquiao, nga dili interesado ang Filipino boxing star nga sangkaon og balik si Thurman ug Horn ug labaw pang wala sa ilang radar ang nanambok nga si Maidana.

Ingon ni Gibbons nga wala nay ikapamatuod pa si Pacquiao batok ning mga nanghagit kaniya sama ni Thurman kinsa sa unang higayon nakatilaw na gyud og pildi sa iyang 30 ka away sa ilang panagsangka ni Pacquiao niadtong Hulyo 20.

Giangkon ni Pacquiao nga lisod gyud kontrahon si Thurman ug gani iya kining gihulagway nga sama sa iyang nakontra kaniadto nga si Antonio Margarito.

Sa niaging adlaw, si Thurman mihagit ni Pacquiao og rematch. Mipasumbingay pa kini nga alang kaniya tabla ang ilang away niadtong Hulyo 20 hinungdan nga angayan lang kini og rematch.

“You know, I got a lot of respect for him. I still think that the fight was nothing more than a draw. You know, I don’t really think that he won the fight,” matod ni Thurman sa interview sa TMZ. “Where’s the contract, Pac? Sign the contract.”

Apan wa kini sakyi ni Pacquiao, matod ni Gibbon ug ingon man ang pagpakigbatok ni Horn kinsa mipukan sa Pambansang Kamao niadtong 2017 didto sa Brisbane, Australia sa kuwestiyonabling desisyon.

Samtang iyang gihulagway si Horn nga desperado, sa samang higayon, gibutyag ni Gibbon nga ang pagpakig-rematch batok ni Floyd Mayweather Jr. maoy ilang gihandom nga mahitabo sunod tuig.

Si Mayweather, sa iyang bahin, mi-post og video clip nga anaa siya sa usa iyang boxing gym nga nag-ensayo sa double-end bag na nakapa intriga nga posibling mobalik siya og away. (JBM)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph