DUL-AN sa 60 ka mga police official sa Cebu City Police Office (CCPO) gipaubos sa kinalit nga drug test human tulo ka mga personnel sa Waterfront police station nagpositibo sa paggamit sa illegal nga drugas.
Gipatawag ni Police Colonel Gemma Vinluan ang iyang mga sakop nga mga opisyal aron makigpulong sa iyang opisina sa CCPO sa Huwebes sa buntag, Agusto 8.
Sa ilang pag-abot, gipahibawo dayon sila nga ipaubos sila sa kinalit nga drug test isip kabahin sa internal cleansing sa Philippine National Police (PNP).
Sa di pa sila molusad sa gubat batok sa ilegal nga drugas, kinahanglan manilhig una sila sa ilang tugkaran, matod ni Vinluan.
Matod ni Police Major Joemar Pomarejos, hepe sa Waterfront Police Station, aron magpabilin ang kridibilidad sa usa ka pulis nga di siya tiggamitan sa illegal nga drugas, kinahanglan nga mamatud-an nga di tiggamitan sa ilegal nga drugas.
Sakop ni Pomarejos ang tulo ka mga pulis nga nag positibo sa kinalit nga drug test sa Police Regional Office 7 nga gipangulohan mismo ni Police Brigadier General Debold Sinas.
Gitug-an ni Pomarejos nga wa siya makabantay nga ang tulo niya ka mga sakop nga nadestino kaniadto sa Drug Enforcement Unit (DEU) mogamit diay sa ilegal nga drugas tungod kay maayo man motrabaho.
“They are performers sa police station. Of course dili nato ma koan kay ang atong makita sa ilaha ang ilang lihok sa contribution sa accomplishment sa station 3. The drug test is a regular activity in compliance to our internal cleansing. Bisag kugihan ta sa trabaho, kugihan manakop, kon ang pulis mosuyop, wala gihapon. The talk of credibility would be defeated,” matod ni Pomarejos.
Ang tulo ka mga pulis naa na nadestino sa Regional Personnel Holding Admin Unit sa Police Regional Office 7 ug nagpaabot nalang sa hukom pag tangtang kanila sa serbisyo.
Ang tulo giila ni Sinas nga sila si Police Corporal John Ramirez Combis, Police Corporal Kinsman Gets Omolon ug Police Corporal Robert Gagatig Amascual.
Gipaubos usab sila sa imbestigasyon sa Regional Intelligence Division 7 kon kinsa ug asa sila magkuhaan sa ilegal nga drugas sa ilang pag gamit niini.
Matod ni Sinas nga gidis-armahan na ang tulo ka mga pulis ug giimbargo usab ang identification (ID) card pagkapulis ug badges.
Dugang niya nga gikinahanglan ang pagpahigayon og drug test sa mga pulis gumikan kay dunay panahon nga makurat nalang sila nga dunay mga pulis nga wa sa listahan apan tiggamitan diay.
“We are trying to address this, mga tao nga wala sa among listahan unya bigla nga mag-positive sa drug test. We are trying to check pod aron maglikay nga mahimong adik aron dili sad masira ilang serbisyo,” dugang ni Sinas.
Sulod sa pito ka buwan karong tuiga, moabot sa pito ka mga pulis ang nagpositibo sa paggamit og illegal nga drugas sa Central Visayas.
Tulo niini sa Negros Oriental, usa sa dakbayan sa Mandaue ug kining bag-o lang nga tulo ka mga pulis.