SA TUYO nga makauli ang na-stranded nga mga pasahero sa pantalan sa dakbayan sa Lapu-Lapu paingon sa isla sa Olango, mihangyo si Lapu-Lapu City Mayor Junard “Ahong” Chan sa Naval Forces Central (Navforcen) alang sa ilang barko nga masakyan sa mga pasahero.
Ang stranded nga mga pasahero sukad pa sa Dominggo, Agusto 4, natanggong sa pantalan sa Angasil sa Brgy. Punta Engaño ug ubang pantalan sa dakbayan.
Sa talaan sa kagamhanan sa dakbayan, moabot na sa 218 ka mga pasahero ang padayong na-stranded.
Moubos hinuon ang naasoyng gidaghanon matag karon ug unya sumala pa ni Chan sanglit ang uban manguli man sa ilang tagsa-tagsa ka mga pinuy-anan sa higayon nga wala gihapoy biyahe.
Sa higayon nga mosanong ang Navy sa hangyo sa mayor mahimo usab nga makasakay pabalik sa mainland sa dakbayan ang mga taga isla nga ganahan molabang, hilabi na ang mga trabahante ug ang ganahan mamalit og mga pagkaon.
Nasayran nga ubay-ubay usab nga mga taga isla ang wala na makatrabaho sukad sa miaging Dominggo sanglit way biyahe ang mga motorbanca.
Gani mao kini ang usa sa hinungdan nga moabot sa 10 ka mga tawo ang na-rescue niadtong Miyerkules, Agusto 7, sa buntag sa kadagatan sa Olango ug Mactan gumikan sa pamasin sa mga taga isla nga makaabot sa mainland sa Lapu-Lapu aron maka-duty sa ilang mga trabaho.
Ang gisakyan sa 10 nga motorbanca sekretong milawig bisan sa pagdili unta sa coastguard gumikan sa gale warning.
Dugang sa mayor nga wala usab makapasar ang roll-on-roll-of vessel nga magbiyahean sa Olango ug Mactan sa gitugotang sakayang pangdagat nga makalawig sanglit 200 gross tonnage lang kini.
Ang gitugotan mao lang ang 250 gross tonnage pataas.
“Ang barko sa Navforcen atong hangyuon nga gikan sa Navforcen kuhaon ang mga pasahero sa Angasil unya dad-on didto sa Olango (ang mga pasahero) unya ang mga passenger sa Olango dad-on sad diri sa mainland,” matod ni Chan.
Ang na-stranded nga mga pasahero padayon hinuong giatiman sa kagamhanan sa dakbayan sa ilang mga pagkaon.
Gikatakda usab nga makadawat og bugas ug de lata ang mga mangingisda ug mga boat operators sa isla nga apektado sa wala nila paglawig sa kadagatan sulod na sa lima ka adlaw gumikan sa bati nga kahimtang sa dagat.
Plano kini nga isakay na lang usab sa mayor kon ugaling mosugot ang Navforcen sa iyang hangyo aron sa ingon maapud-apod na kini sa apektadong mga lumolupyo sa mga isla sa Lapu-Lapu.
“Kaning mga nagpadayon pa ug kawat-kawat ug biyahe ato ng pahimangnoan nga dili gyud pwede kay gidid-an man gyud sila, kung ilang ipamugos kining permit nila sa city sa mga pumpboat among i-revoke,” pagpasabot ni Chan sa Superbalita Cebu. (GCM)