DAKO ang pag mahay ni alyas 'Rene' nga naapil sa 370 ka mga sabongero nga nadakpan sa mga sakop sa Criminal Investigation and Detection Group 7 niadtong Lunes, Agusto 5, tungod kay gitaktak siya sa iyang trabaho sa usa ka motor company sa siyudad sa Mandaue.
Matod niya nga igo ra unta siya nga mihapit sa D and C coliseum aron mosugal sa itari nga manok sa iyang higala, apan nadakpan na hinuon siya.
Ang nakaparat kay ang iyang higala nga maoy tag-iya sa manok wala maapil sa pagdakop kay miuna kinig lakaw.
Nagpabilin una siya aron mo uwat sa laing sultada aron makabawi sa iyang pildi, apan siya na hinuon ang gidakop.
“Malas gyud kaayo, Sir. Ang nag tawag nako nga pahapiton ko sa buwangan kay itari iyang manok wala madakpi kay niunag uli. Ako kay misugal pa sa laing manok naabtan nuon sa mga police.Pastilan paita na tangtang pako sa trabaho,” matod ni Rene.
Apan wala makapatagam kaniya ang pagsugal sa sabong kay matod pa niya mao ra kini ang iyang kalingawan.
Si Armando, usa ka security guard, nitug-an nga dili na siya mobayad sa multa kay iya rang serbisyohan sulod sa tulo ka adlaw.
Matod niya nga tulo na siya ka adlaw sa CIDG-7 sukad sila nadakpan ug kinahanglan nalang og duha, makagawas na, matod pa niya.
“Ah diri nalang ko, duha nalang bitaw ka adlaw. Gamay nalang nga utong, Sir, makagawas na ko,” matod ni Armando.
Wa pa sila hingpit nga makagawas kagahapon bisan pa man nga napasaka na ang kaso ngadto sa piskaliya sa Siyudad sa Mandaue.
Naa pa sila sa atubangan sa buhatan sa CIDG-7 gibantayan sa mga pulis sa Siyudad sa Sugbo aron walay bisan usa kanila ang maka gawas.
Ang dul-an sa 400 ka mga tawo gipangdakop niadtong Lunes tungod sa tari nga kay nahasupak sa nasudnong balaud ug mando ni Presidente Rodrigo Duterte nga kini sumpuon.
Matod ni Police Major Edwin Lacostales nga maoy arresting officer sa mga sabongero nga gisuplayan pa gihapon silag pagkaon sa ilang pamilya lakip na sa Kagamhanan sa Siyudad sa Mandaue.
Gipaabot nalang sa CIDG-7 ang resulosyon sa piskalya kon mahimo na ba nga maka pyansa ang mga dinakpan sa ilang mga kaso o multa nga gilatid sa balaod.
Gusto na usab sa kadagkoan sa CIDG-7 nga maka gawas na ang mga sabongero sanglit nakita nila ang kalisud sa ilang kahimtang nga naa ra sila sa gawas.
“Depende sa resolusyon ng Fiscal, kung ano ang decision. Mas maganda kasi para makalabas na rin sila kasi kawawa naman. Ang dami din nila,” matod ni Lacostales sa Superbalita Cebu.
Naa na hinuon silay tent nga gipadala ang management sa buwangan aron dili ma initan ug maulanan ang mga sabongero ug mga trabahante niini.
“Nagbibigay naman sila ng pagkain, may portalet din may tent at lahat naman binigay,” dugang ni Lacostales.
Tungod sa pagkasikop sa mao nga mga tawo, dunay nabuking nga mga sekreto sa mga sabongero.
Dunay nasakpan nga wa mananghid sa asawa nga nanugal diay ug wala motrabaho, dunay nasakpang dunay kabit, daghang nakapalta sa trabaho ug wala na makatiman sa ilang negusyo. (AYB)