ISIP kabahin sa clearing operation sa mga dalan nga iya sa gobyerno, Huwebes sa buntag, Agusto 8, giuna sa paghawan ang merkado publiko sa Barangay Tabunok, siyudad sa Talisay.
Gipangunayan ni City of Talisay Traffic Operations Development Authority (CT-TODA) head, Jonathan Tumulak, ang pagdumala sa clearing operation.
Uban kanila ang Market authority ug Talisay Clearing Team sa pagpanghawan sa dalan duol sa merkado ug sa ilawom sa flyover.
Ang dul-an sa 100 ka mga tricycle nga kaniadto diha lang sa dalan mo-park, sa ilawom flyover ug sa mga sidewalk, karon ang gipahimutang na gyud sila sa sulod sa ilang parking area.
Ang maong mga tricycle magbyahian gikan sa merkado Tabunok, padulong sa Barangay Lagtang, Jaclupan, Laawan, Pooc ug Biasong.
Ang kaniadto nga mga mamaligyaay og mga adobong manok ug baboy diha sa sidewalk gipahimutang tupad sa parking area sa mga tricycle.
Mao kinihinungdan nga sugod kagahapon sa udto, Agusto 8, hayahay na ug maagian na dili lang ang dalan, kundi lakip na ang sidewalk alang sa mga nanaglakaw.
Dugang ni Tumulak nga kon kaniadto gitugutan lang usab sa sidewalk ang pagkaon nga susama og pungko-pungko, karon gidili na, take-out na lang gyud, aron dili makabalda sa ubang mga moagi sa dapit.
Kaniadto adunay dul-an sa 20 ka mga ambulant vendor diha sa sidewalk.
Samtang ang mga pribado nga sakyanan, mapa-motorsiklo ug 4-wheeled vehicle, gikinahanglan na nga mo-park diha sa gitagana ug bag-uhay lang nahuman sa pagpatukod nga parking lot.
Sa pagkakaron, gipagamit pa kini nga libre sa publiko. (FMD)