DUL-AN sa 300 ka mga driver nga nakalapas sa lagda sa trapiko sa Siyudad sa Talisay gipasakaan na og kaso ngadto sa Talisay City Prosecutors Office, Huwebes sa hapon, Agusto 8.
Tipik kini sa 2,000 ka mga motorista nga nakalapas sa traffic laws sugod niadtong Hulyo 9, hangtud na Agusto ning tuiga.
Ang 300 wa nipatim-aw ug ni-settle sa ilang bayranan.
Gitug-an ni Jonathan ‘Joy’ Tumulak, pangulo sa City Of Talisay Traffic Operations Development Authority (CT-TODA), nga human siya nipahibawo sa konseho niadtong Hulyo 16 nga mopasaka sila og kaso, Miyerkules, Agusto 7 pa lang nila nakompleto ang mga papeles alang sa dul-an 300 nga pasakaanan og kaso.
Sa lagda, ang mga traffic violator hatagan og tulo ka adlaw aron mopatim-aw sa buhatan sa CT-TODA ug pagbayad kon pila ang nalatid sa gi-issue nga citation. Ang wa pagpatim-aw human ang tulo ka adlaw, nagpasabot nga pag-waive na niini.
Kasong kriminal ang mapasaka batok sa driver nga nakalapas ngadto sa piskaliya. Padad-an sila og subpoena ug kon di mopatim-aw, hayan ipadakop na sila sa korte.
Dungan sa estrikto nga pagpatuman sa ‘no helmet, no driving’ policy, hugot usab nga gipatuman ang ubang lagda sa trapiko, sama sa di pag-obstruct sa ubang sakyanan. Pasabot ini nga kon anaa ka sa left lane, kinahanglang moliko pawala, atol na sa pag go-signal.
Lakip usab sa gipatuman ang pagdakop sa illegal parking.
Ang way helmet adunay multa nga P300 ngadto sa P500 samtang ang ubang mga kalapasan sama sa way lisensya, rehistro, obstruction, ug uban pa adunay katugbang nga tag P500. Pagpasabot ni Tumulak nga ang ilang pagkiha usa ka paagi pagpakita nga seryuso sila sa ilang pagpatuman sa lagda sa trapiko.
“Naabtan gyud og mga one month, kay tungod sa kadaghan nila, ug gikompleto sa gyud nato ang mga needed documents. Ato gyud filan, kay lakip mani sa naa sa ordinansa, ang pagpasaka og kaso,” tug-an ni Tumulak.
Samtang gipaabot na lang niya nga amendahan ang ordinansa sa lagda sa trapiko human gihangyo na niya ang konseho nga usbawan ang bayranan sa penalty nga gikan sa P500 ngadto sa P1000.
Kay ang maong bayranan nga anaa sa ordinansa niadto pang 2012. FMD