PATAY ang usa ka lalake samtang samdan ang iyang kauban human giingong nakigpinusilay sa kapulisan sa Brgy. Catarman, lungsod sa Liloan, niadtong Miyerkules, Agusto 7, 2019.
Nailhan ang namatay nga si Florencio Derecho Almerez Jr., alyas “Jong-Jong”, 30, samtang nakaangkon og samad pinusilan si Aldrin Asis Lucernas, 22, pulos taga National Road, Brgy. Looc, Siyudad sa Danao.
Luwan sila sa usa ka motorsiklo ug nagtaptap sa ilang mga nawong samtang naglibot-libot sa nahisgutang barangay.
Matod ni Police Major Danilo Culitano, hepe sa Liloan Police, naalarma ang mga lumulopyo sa dapit sa presensya sa maong mga lalake hinungdan nga dali nilang gitawag ang kapulisan.
Sa ilang pagresponde, giingong namusil sila si Almerez hinungdan nga ningbawos ang mga pulis. Ang duha nangaigo sa nagkadaiyang bahin sa lawas.Bisan samdan, ilang gipangpusasan sila si Almerez ug Lucernas pagdala sa tambalanan. (ANV)