USA ka nars nga garbo sab sa siyudad sa Mati, nga si Franco Ben Rocamora milabni og silver medal sa Vocals Open Category sa World Championship of Performing Arts (WCOPA) bag-uhay lamang.
Sa nakalalabay nga Agosto 8, miduaw siya sa buhatan ni Mati City Mayor Michelle Nakpil Rabat, human miabot gikan Hollywood sa California, USA.
Ang mayor malipayon sa kalampusan ni Franco Ben nga wala lamang nagdala og dungog sa iyang pamilya, apan lakip na sa tibuok komunidad sa Mati.
Ang WCOPA giilang "World Talent Olympics" nga matag tuig nga ginahimo sa Hollywood.
Ginasalmutan kini sa nagkadaiyang nasud nga mopakita sa ilang talento sa pagkanta, sayaw, modeling, pagpatugtog og instrumento, lakip na akting ug uban pang arte.
Karon nga tuig, ang 23rd WCOPA gihimo sa Long Beach Performing Arts Center sa Long Beach, Los Angeles gikan Hulyo 12-22, 2019.
Usa si Jed Madela nga produkto ning kompetisyon nga midaug nga Senior Grand Champion Performer of the World niadtong 2005.
Siya sab ang nagsilbi nga vocal coach ug mentor ni Franco Ben.
Sa kompetisyon karon nga tuig ang delegasyon sa Pilipinas milabni sa 298 medals diin 136 dinhi ang gold, 86 ka silver ug 76 ka bronse, uban pa ang laing medalya nga misuma total tanan og 390 medalys.
Duna say tulo ka Pinoy nga nahatagan sa New York Film Academy Scholarship.
Samtang ang grupong Coalixion, gikan Sultan Kudarat, midaug as 2019 Senior Grand Champion Dance Group. (With PR)