Editoryal: Seguridad

HITSAS na ang hisgutanan sa seguridad sa saulogong ika-34th Kadayawan sa Dabaw.

Siyempre, kung siyudad sa Davao ang hisgutan, gikinahanglan nga anaa gayod kini sa luwas nga kahimtang gumikan ngari nagpuyo ang presidente sa nasud.

Sumala ni Davao City Police Office (DCPO) spokesperson Police Captain Ma. Theresita Plaza-Gaspan atol sa AFP-PNP Press Conference, nga anaa sa 4,000 ka mga pulis lakip na ang mga forces multipliers nga magbantay sa palibot diin asa ginapahigayon ang mga programa.

Gilauman sa lokal nga kagamhanan sa Davao City nga mas modoble pa ang gidaghanon sa mga bisita hinungdan nga mas gipatas-an ang adlaw sa selebrasyon.

Agosto, 17 matigayon ang Indak-Indak sa Kadalanan, samtang pagka Agosto 24, matigayon ang Pamulak sa Kadayawan.

"Since week-long gyud ang celebration, labi na kay nausab ang petsa, sa Floral Float Parade, moabot sa August 24, so ning first week pa lang sa Agosto gimuntar na ang security forces sa kapulisan apil na ang mga force multipliers nato," ingon ni Gaspan.

Hugot sab ang inspeksyon sa tulo ka mga checkpoint sa TF-Davao sa Brgy. Sirawan, Toril Davao City, Brgy. Lacson, Calinan District ug sa Brgy. Licanan sa Bunawan District.

Aron nga mas madugangan pa ang kompiyansa samtang naglingaw-lingaw ang katawhan diha sa pagduyog sa mga programa, kinahanglan nga motuman gayod sa mga regulasyon nga gipatuman sa otoridad.

Usa sab sa gikinahanglan mao ang pagkamabinantayon sa matag-usa diha sa palibot ug gilayong itaho sa awtoridad kung dunay kadudahang lihok sa tawo ug mga kadudahang gibilin nga butang.

Maayong magmabinantayon gayod, dili mokumpiyansa.