DAVAO DEL SUR -- Nagpasidaan ang mga awtoridad sa probinsiya ngadto sa katawhang nanimuyo sa mga sagbutong bahin nga lugar nga mag-amping gyud ilabi na sa mga malala nga mananap.
Kini human nga usa ka mag-uuma nga gitukob patay sa bitin niadtong Lunes.
Sumala sa taho gikan sa Malalag Municipal Police Station, nabangalan na lang nga way kinabuhi si Rico CabaƱero Canoy, 27, molupyo sa Purok 5, Barangay Bolton sa lungsod nga dunay samad sa lawas.
Si Dr. Teresita Golingay-Emphasis, health officer sa lungsod, nagpaguwa og resulta sa otopsiya base sa samad nga naangkon sa biktima niadtong Martes nga ang nipatay kaniya lala (venom) sa bitin nga King Cobra.
Si Police Senior Master Sergeant Gherson Guerrero, imbestigador sa kaso nagbutyag nga Dominggo sa hapon, Agosto 4, milakaw ang biktima sa ilang balay.
Base sa pananghid sa iyang asawa, motrabaho siya sa ilang umahan. Apan wala na siya makauli nianang pagka-gabii sa maong adlaw.
Gumikan niini, gipangita ang biktima sa iyang mga kabanay ug sa dihang niabot sa umahan, nakaplagan si Canoy nga nagbuy-od na ug wa nay kinabuhi sa kasagbutang bahin sa lugar.
Sumala sa mga molupyo sa nahisgutang lugar, aduna silay napatay nga duha ka bitin sa sagbutang bahin pipila ka semana na ang milabay apan wala hinuon masuta kon unsa nga matang sa halas.
Gituohan nga ang maong lugar gipuy-an sa daghang halas tungod sa kasagbutan nga kinaham nga puy-an sa mga bitin kay bugnaw. (OBD)