21 na patay sa dengue sa Region 11

MOABOT na sa 21 ang patay sa 4,345 sa kaso sa dengue sa rehiyon sukad Agosto 5, 2019.

Kini subay sa natala sa Department of Health (DOH) 11.

Sa press conference kagahpon, si Health Assistant Secretary Abdullah B. Dumama nagsulti nga kasagaran sa namatay nahitabo dinhi sa siyudad sa Davao nga moabot og 11, gisundan sa Davao del Norte nga 6, samtang Compostela Valley, Davao del Sur, Davao Occidental, ug Davao Oriental dunay 1 matag usa.

Niadtong 2018, ang DOH 11 nakatala og 14 nga patay.

Giklaro hinuon ni Dumama nga kadtong mga biktima kinsa namatay sa dengue wala ma-indiksyoni og Dengvaxia kaniadto nga posibleng nipasamot sa ilang kahimtang.

Alang sa ihap sa mga kaso sa dengue karong tuiga, ang siyudad sa Davao nanguna sa pinakadaghan nga pasyente nga 2,168, nisunod ang Compostela Valley sa 788, Davao Oriental maoy ikatulo nga 641, unya ang Davao del Norte nga 562, Davao del Sur naay 151, ug katapusan ang Davao Occidental uban sa 35.

Gikanayon ni Dumama nga bisan og ang DOH nagdeklara niadtong Martes, Agosto 6, nga national dengue epidemic kay ang mga kaso padayon nga nagtaas, ang Davao Region nagpabilin nga naa sa "alert threshold". Apan dugang niya nga dunay dakong posibilidad nga ang ihap mahimong moabot sa "epidemic threshold" kon di mapugngan.

"Actually it's national declaration so even if a region is not highly affected or not badly affected, pwede na kasi national na. Yong mga LGUs can access the calamity fund," matud niya.

Sumala ni Dumama nga ang DOH-Epidemiology Bureau nasayud na nga karong Oktubre, ang dengue gilauman nga motaas, hinungdan nga nag-awhag sila sa publiko nga magpakabana ug mosalmot sa ilang kampanya nga paphaon ang mga itlogan sa mga lamok pinaagi sa relihiyusong pagtuman sa 4 o'clock habit sa panimalay ilabi sa panahon sa ting-ulan.

"We are still expecting more at ang Davao Region hindi pwedeng maging complacent kasi maaring nasa below alert threshold pero in October kung hindi sugpuin ito magha-hatch na naman ang mga eggs after four months maging adult na in how many days and pwede na silang mangagat," pagklaro niya.

Gipananglitan ni Dumama ang giingon sa pipila ka mga tigpangduki-duki, ang climate change mihatag og maayong puy-anan sa mga lamok aron nga mokuyanap pa kini og dali.

Kaniadto, moabot sa 10 hangtud 14 ka adlaw una sila makapaak apan karon upat na lang ka adlaw tungod kay ang igang nga temperatura haum kaayo alang ning maong insekto nga mopadaghan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph