DALAYGON kining panaghi-usa sa mga pulitiko karong panahuna. Ang labing maayong ehemplo mao ang panaghuyhoy sa mga pulitiko sa Barili, Cebu. Ang kaniadto magka-atbang nga grupo ni Bise Mayor Julie Flores ug ni Dr. Jay Ruiz nagkasuod na sa grupo ni Mayor Marlon Garcia. Dugay nang nanghinaut si kanhi Cebu City Mayor Alvin Garcia, ig-agaw sa mayor ug ang uyoan nga si kanhi Dumanjug mayor Tomas Garcia nga magkahi-usa na unta ang duha ka magka-atbang nga grupo. Naka-uyon man gud sila sa panirbisyo ni Flores. Niadtong milabay nga pista sa Barili murag nasemento na ang maong relasyon sa dihang namista gayud si Mayor Marlon ug iyang igsuon si 3rd District Congressman Pablo John Garcia sa panimay ni Bise mayor Flores. Gikalipay sa taga Barili ang maong kalambuan kay daghan na unyang proyekto ug ubang ayuda ang mahatag ni Kongresista Garcia sa Barili. Gipaabut nga ang Julie Flores for mayor ug Marlon Garcia for vice mayor na ang tandem kay katapusan na man karong termino ni Mayor Marlon.
Dinhi sa Metro Cebu, gihangop usab ang panag-alayon nila ni Cebu City Mayor Edgar Labella, Mandaue City Mayor Jonas Cortes, Lapu-Lapu City Mayor Ahong Chan ug Talisay City Mayor Samsam Gullas. Tungod niini, matukod na unya ang dugay nang giplano nga Metro Cebu Traffic Administration aron magkahi-usa sila sa pagsulbad sa problema sa trapiko. Pwede usab nga maghi-usa sila alang sa integrated drainage system ingon man sa pagpangita og labayanan sa ilang mga basura. Kining integrated transport system sayun na usab kaayong mapatuman. Hinaut pang tungod niining gipakitang panagtambayayong sa mga mayor hinaut pang ang tanang mga pulitiko kalimtan lang usa ang partisan politics og magtambayayong alang sa kaayuhan sa kinabag-an. Mahimo man kining gitawag nga critical collaboration.
•••
Natay-ug karon ang Ubos Balay-Balauranan o kongreso tungod sa pagpili og mga pangulo sa nagkalainlaing chairman sa mga congressional committees. Nasayran nga ang House speaker mao gayud ang mipili og mga chairmen. Adunay daghang mga sakop sa PDP-Laban ang mobalhin ngadto sa National Unity Party (NUP). Gani gituhoan nga si Kongresista Paolo Duterte mu-ipon usab sa NUP. Daghan ang nangreklamo nganong upat lamang ka sakop sa PDP-Laban, nga mao ang kinadaghanan og sakop, ang natudlo nga chairmen. Ang uban usab nga mga sakop sa PDP-Laban buot mobalhin ngadto sa Nationalista Party nga pinangulohan ni Senador Cynthia Villar. Gikahadlokan nga dili matuman kadtong gimbut-an ni Presidente Rodrigo Duterte nga magtunga sa speakership sila si Alan Peter Cayetano og Lord Allan Velasco. Daghang nanganti nga human sa 15 ka buwan nga paghupot ni Kongresista Cayetano sa speakership nga magpatawag silag eleksiyon ug magpili silag lain nga speaker nga dili si Velasco. Posible si Kongresita Paolo Duterte. Kining kalihukan karon sa kongreso dili hinuon makahulga sa administrasyon ni Presidente Duterte kay mga sakop man gihapon sila sa majority coalition. (mannyrabacal1144@gmail.com)