GIDEKLARAR sa Department of Health ang usa ka national dengue epidemic human natala ang 146,061 ka mga kaso sa dengue gikan sa buwan sa Enero hangtod sa Hulyo. Niabot na sa 622 ang gikatahong namatay tungod sa dengue.
Nag-una ang Western Visayas nga adunay 23,330 ka mga kaso sa dengue. Gisundan kini sa Calabarzon nga adunay 16,515 ka kaso ug sa Zamboanga Peninsula, Northern Mindanao and SOCCSKSARGEN.
Wa malakip sa listahan ang Central Visayas sa mga rehiyon nga nikuyanap ug nisaka ang mga kaso sa dengue. Tingali makapangutana kita kon ngano. Unsa may nakalahi sa Central Visayas nga naglakip sa lalawigan sa Sugbo, Bohol, Negros Oriental ug Siquijor?
•••
Wa mahibaw-i sa tanan nga adunay usa ka pundok nga naglihok sa pagkontrolar sa dengue sa atong rehiyon. Mao kini ang Dengue-Free Movement nga gipangulohan ni Dr. Wyben Briones ug gitambayayongan sa Rotary Club of Metro Cebu.
Ang dengue gidala sa mga lamok. Apan ang lamok nga maglupad-lupad na lisod kaayong dakpon ug patyon. Busa nahuna-hunaan ni Dr. Briones nga mas sayon nga patyon ang mga lamok samtang larva pa sila. Mao nang mga pito-pito, kiti-kiti.
Unsaon man pagpatay ang mga larva sa lamok nga nagdala sa dengue? Sama sa gibuhat didto sa Thailand, butangan og larvicide ang mga nagbanaw ug nagbiaw nga tubig nga iloganan sa mga namok aron mapatay ang mga larva sa lamok. Gihimo kini sa Dengue-Free Movement sa tibuok Central Visayas uban sa pagkitambayayong sa Department of Education.
•••
Si Cebu Gov. Gwendolyn Garcia niingon nga ang Kapitoyo makigtambayayong sa Department of Health (DOH) 7 ug sa Vicente Sotto Memorial Medical Center tungod sa gideklarar nga national dengue epidemic.
Sagad nga buhaton mao ang search and destroy sa puy-anan sa mga lamok. Apan mahimo ba kini kada aslaw? Dunay barato nga larvicide nga mapalit sa kagamhanan sa lalawigan sa Sugbo. Ang larvicide mopatay sa mga larva sa lamok bisan kon matug lang ang mga kawani sa Kapitolyo.
Nahibung lang ko nganong hangtod karon wa sagupa sa Department of Health ang paggamit og larvicide. Ang gigamit hinuon mao ang Dengvaxia nga nahimong controversial.