WALA na bay oposisyon sa Cebu Provincial Board? Asa man si Vice Gov. Junjun Davide III? Rubber stamp o estampad ba ang Hunta Probinsiyal? Ako kining gipangutana gumikan kay niadtong Lunes atol sa ilang regular session gipasar ang appropriation ordinance sa supplemental budget (SB) nga nagkantidad og P1.38 bilyones nga way nisupak bisan usa ka sakop.
Ang supplemental budget nga gihangyo ni Gov. Gwen Garcia napasar sa first, second, third and final reading nga way nangahas sa pagsupak o mi-kuwestiyon sa pagpasar. Tiaw ba nimo kanang mga 10 minutos lang napasar na ang ordinansa. Morag kilat. Matod pa ni Bokal Glenn Soco, chairman sa committee on budget and appropriations, nga basta way mosupak, ila dayon kining ma-endorso sa hawanan ug dayon ma-aprobahan.
Dakong pahat sa supplemental budget para sa pag-ayum-ayum ug pagtukod og mga bag-ong kalsada. Ingon man tabang sa mga barangay labi pa ang paghatag og financial assistance sa pagsaulog sa ilang pista. Buot bang ipasabot nga matag barangay nga magpista hatagan og tabang sa Kapitolyo? Hayahaya gud nila. Magkumbira sila unya ang mga magbubuhis pagastuhon. Apil usab sa SB mao ang paghatag og hinabang sa mga dakbayan og munisipyo nga mosalmot sa Pasigarbo sa Sugbo karong buwana.
Nganong way misupak? Mga amang ba ang atong mga bokal? Asa man si Davide nga maoy nangulo sa oposisyon? Wala gyud siya mo-ek nga unta ang tumong sa SB dako mang insulto kaniya. Ngano man? Ang tumong ini mao ang inprastraktura. Sa ato pa, wala kini niya mahatagi og pagtagad sa dihang siya pa ang gobernador? Dili ba supak man usab siya sa Pasigarbo sa Sugbo kay nag-usik-usik sa kuwarta sa lalawigan?
Nganong wa siya mokanaug isip presiding officer ug misalmot sa diskusyon aron mahatagan og igong kalamdagan ang isyo? Asa man ang ubang taga opisisyon? Importante kaayo ang pagpakabana sa oposisyon labi pa kon kuwarta na ang hisgutan. Importante ang oposisyon aron adunay ‘check and balance’. Wa ko mo-ingon nga mosupak gyud sila. Motingog lang unta sila aron maayag ang isyo. Kon di magpakabana ang taga oposisyon, kinsay motingog? (bobbygnalzaro@gmail.com)