PASADO alas 4 sa hapon, Huwebes, Agusto 8, naabot sa Sugbo ang pito ka mga lawas sa mga Sugboanong nangamatay sa pagtikyaob sa mga bangka sa Iloilo Strait, sa Dakbayan sa Iloilo.
Sakay sa C-130 sa Philippine Air Force, naabot sa Mactan Airbase ang mga lawas nila ni Jared Janson, Bernardo Janson, Danilyn Baguio, Rommel Baguio, Dannelle Baguio, Romeo Baguio Sr., ug Angelina Baguio.
Wa na dalha ang patayng lawas nila ni Romeo Baguio Jr., ug sa anak niini nga si Jay Arvien Baguio tungod kay didto sa isla sa Guimaras na kini hayaon diin nagpuyo ang kapuyo ug minyoan unta ni Romeo Jr., nga si Maria Nieves Grandeza.
Molabang unta sa isla ang pamilyang Baguio ug Janson kay mamalaye sa pamilya ni Grandeza sa isla sa Guimaras.
Mismo si Cebu City Mayor Edgardo Labella mao ang usa sa nisugat sa mga patayng lawas inubanan sa mga miyembro sa pamilyang nagbangutan.
Lima sa mga lungon di na pwede nga ablihan tungod kay nadugta na ang lawas sa sulod.
Samtang ang tanang pito ka mga patayng lawas gihaya sa Ermita Gym. Si Ermita Barangay Captain Mark Miral, mao ang usa sa nilarga paingon sa Dakbayan sa Iloilo aron maasikaso ang papeles sa mga patayng lawas ug aron madali ang pagdala pabalik sa Sugbo.
Ang Office of the Presidential Assistant for the Visayas pinaagi ni Secretary Michael Dino mao ang nakig-coordinate sa Office of the Civil Defense (OCD) Western Visayas ug Philippine Air Force aron magamit ang C-130 pagdala sa mga lawas sa mga biktima.
Niadtong Miyerkules sa gabii, Agusto 7, dihang nibisita si Presidente Rodrigo Duterte sa Iloilo City aron makighinabi sa mga pamilya diin nipadayag usab kini sa iyang kasubo.
Si Labella, sa iyang bahin, nagkanayon nga ang Cebu City government moabag sa tanang galastuhon sa pagpalubong sa mga patayng lawas.
Dugang sa mayor nga kahinumdom siya dihang biktima usab siya sa nalunod nga barko, diin 36 ka oras siya nga naglutaw sa dagat. (HBL)