BATAN-ONG mga babaye nga giingong halos na lang maghubo samtang gipasiritan og beer ug nanayaw atubangan sa gatusan ka mga tawo sa usa ka kalihukan sa gymnasium sa Carmen gipasusi.
Ang maong kalingawan tipik sa besperas sa kasaulogan sa Sinulog sa lungsod sa Carmen niadtong Enero.
Nagtuo ang konseho nga law-ay kaayo ang mao nga pasundayag mao nga ilang giawhag ang Provincial Board sa pag-imbestigar.
Ang Konseho sa lungsod nga nipasar sa resulosyon 2010-13 nga gipangamahanan nila ni Konsehal Imelda Seno, chairman sa committee on women ug Konsehal James Camara, chairman sa committee on laws, nag-awhag kang Bokal Agnes Magpale, chairperson sa Committee on Women sa PB, sa pag-imbestigar sa hitabo.
“Requesting the Committee on Women chaired by Hon. Agnes Magpale to investigate the propriety of the show entitled “Carmen Rain Dance 2010” held last January 23, 2010 at the Municipal Gymnasium,” matod sa resulosyon nga gipalabang sa mayoriya sa konseho.
Sa walo ka mga konsehal nga ningtambong sa sisyon, sila si Konsehal Baltazar Capuno ug Regel Bacula ang ning-abstain sa botasyon.
Si Seno nga nahinabi sa Sun.Star Superbalita niingon nga law-ay ang ilang nakita atol sa maong hitabo.
Gihulagway sa konsehal nga niapil sa kompetisyon mao ang batan-ong mga babaye nga mugbo kaayo og short pants nga gipangsul-ob ug halos molugwa ang mga dughan sa kahuot ug kaseksi sa mga sapot samtang nagsayawsayaw sa stage.
Dungan sa pagsayaw, adunay tawo nga mopasirit og beer sa tibuok lawas sa mga babaye nga nagsayaw.
“Unya mag grind-grind ang mga babaye nga manayaw nga humod sa beer ang lawas,” hulagway pa ni Seno.
Nanghinaot ang konsehal nga maaksyunan dayon ni Magpale ang ilang resulosyon. Gitumbok ni Seno si Mayor Sonia Pua nga nagpasiugda sa kalingawan.
Apan dihang gikuhaan og reaksyon sa Sun. Star Superbalita ang mayor dunay kalihukan.
Si Konsehal James Camara sa iyang bahin nitumbok kanila ni Capuno ug Bacula nga nga ningtambong sa kalingawan.
“Unta mga sulogoon sila sa lungsod, lawmakers sa lungsod, ila unta tong gipahunong,” matod ni Camara.
Dugang pa sa konsehal nga ang mga babaye nga nisalmot gi-hire gikan sa siyudad sa Sugbo ug uban pa nga mga lugar ug gidala sa ilang lungsod.
“Dili na tomo-tomo. Kay abi kay duol na ang eleksyon, nakita man gani na sa cable sa tibuok 5th district,” matod sa konsehal.
Apan si Konsehal Regel Bacula sa pagpakighinabi sa Sun. Star Superbalita nanghimakak nga didto siya sa pagka hitabo.
Matod sa konsehal nga nakakita lang siya sa salida sa cable nianang pagka buntag sa dihang nagpaingon siya sa trabahoan.
“Bakak na nga didto ko. Didto ra ko sa bay kay gihilantan ko. Pero sa akong nakita, dili man bati, kataw-anan man,” matod sa konsehal.
Giangkon usab sa konsehal nga tipik lang sa salida ang iyang nakita ug wa niya matiwas og tan-aw ang salida sa cable.
“Gikargahan lang na sila sa bise mayor. Gidiktahan na sila nga mao nay buhaton nila,” matod ni Bacula.
Si Pua nga kuhaan unta sa iyang reaksyon, wa makighinabi sa SunStar Superbalita kay adunay tigom nga gitambungan.
Apan si Dona Buot, executive secretary sa mayor, niingon nga gi-welcome ni Pua kon adunay inbestigasyon nga himuon ang Provincial Board ug andam niya kining tubagon, matod ni Buot.