GILIBKAS na ang closure order nga gipahamtang sa kagamhanan sa dakbayan sa Talisay ngadto sa dakung pabrika sa bihon ug pancitan sa Barangay Cansojong ganihang Biyernes sa udto, Agosto 9.
Pwede nang makabalik sa ilang normal nga operasyon ang pabrika sa CitiFood ug President Food Product Industries Inc. human nga nakakuha sila ug clearance og permit isip coal user gikan sa Department of Energy-Central Visayas (DOE 7).
Apan giklaro ni Atty. Russ Mark Gamallo, ang legal counsel sa DOE-7, nga na-clear lang sa administrative case ang duha ka kompanya human sila nibayad og administrative fines.
Ang maong clearance nga gitagana sa DOE 7 wala pay labot niini ang pagkalambigit sa duha ka pabrika sa bihon ug pancit sa kawat sa 33.2 milyones pesos nga balor sa mga uling, nga ebidensya sa DOE batok sa ilegal nga pag baligya niini.
Ang duha ka kompanya, nga gipanag-iya ni Aldrich Lucio Ngosiok, ang gironda sa taga DOE 7 niadtong Hulyo 30 human masayri nga sila ang nipalit sa coal nga gisakmit sa DOE-7 didto sa Pier 8, dakbayan sa Mandaue.
“Ang Citifood nibayad na sa administrative fines, nibayad sila sa violations sa 3 nila ka plants, 2 in Talisay and one in Minglanilla.
Unya ang criminal case walay labot ana, we are still collating the documents for the filing of the criminal cases for theft, obstruction of justice and anti-fencing,” sigon ni Gamallo sa Superbalita Cebu.
Sa iyang bahin, niingon si Talisay City Mayor Gerald Anthony "Samsam" Gullas nitataw nga bisan paman og clear na sila sa DOE, kinahanglan gihapon tumanon sa maong pabrika ang hangyo sa siyudad labot sa mga reklamo sa publiko batok sa ilang pabrika.
Tungod niini, si Ngosiok ang nipadala og Affidavit of Undertaking ngadto sa mayor niadtong Huwebes, Agosto 7, diin nakalatid niini ang ilang mga tulomanon para himpit nga ilibkas ang closure order sa ilang pabrika.
Ilang nasabotan nga ang kompaniya maghimo og konkreto o aspalto nga karsada padung sa ilang tugkaran, diha sa Bihonan road sa Barangay Cansojong.
Mangita sila og paagi sa pagkontrolar sa polusyon sa kahanginan mugna sa ilang operasyon ug ang paglimpyo o paghimo og bag-ong drainage aron malikayan na ang pasangil sa mga residente sa palibot sa pabrika nga sila mulabay og hugaw nga tubig.
Nisaad sad kini nga imentinar nga luwas ug limpyo sa ilang lugar para sa ilang mga trabahador ug sa mga namuyo duol sa ilang pabrika.
Pormal nga gipirmahan ang maong memorandum ni Ngosiok uban sa mga abogado sa dakbayan.
Sigon ni Gullas nga bisag nalibkas na ang closure order sa pabrika, siguradoon nila nga dili ka renew sa ilang business permit ang maong bihonan kung dili sila makatuman sa ilang mga saad sa lokal nga kagamhanan.
“Though I appreciate that the factory has contributed to the income of the city in terms of the taxes and has given employment to some of our constituents, I cannot just stand by while our people suffer because of unscrupulous business practices,” pamahayag ni Gullas diha sa iyang Facebook page. (FMD)