ORMOC CITY, Leyte -- Malampuson nga napahigayon sa Ormoc City ang ika-third quarter nga Nationwide Simultaneous Earthquake Drill Huwebes, Agusto 8, 2019.
Ang Ormoc City ang host city sa maong aktibidad ug gihimo ang drill sa nagkadaiyang lugar sa dakbayan.
Ang kalihukan gipangunahan ni Ormoc City Mayor Richard Gomez ug gitambongan sa mga kadagkoan sa Office of Civil Defense (OCD) sa kaulohan.
Gidayeg sa OCD ang gipakita nga kaandam sa dakbayan simbako og duna'y moigo nga katalagman.
Matud ni Susan Juangco, service director sa OCD-Capacity Building and Training Services, ilang naobserbaran nga kumpleto sa response indicator ang dakbayan sama sa contingency plan.
"It is a very good thing that Ormoc has a contingency plan. Kumpleto ang response cluster. They have all the resources and they show their dedication and commitment," matud ni Juangco.
Kontento usab si OCD Administrator for Administration Kristoffer James Purisima sa iyang nakita nga presentasyon sa dakbayan.
Alas 2 sa hapon hingpit nga gipislit ang buzzer, pasabot nga duna kunuhay 7.2 magnitude nga linog nga miigo sa may Burauen diin nabatyagan sa Ormoc ang intensity 8.
Niini, dali nga gitukod sa kagamhanan ang temporary command center ug mismo si Gomez ang nangulo ug nimando sa mga response team sa kinahanglan buhaton.
Nanggawas dayon ug misusi ang tanang fire truck ug medics sa Bureau of Fire Protection, nilibot usab ang tanan patrol vehicles sa kapulisan.
Ang Philippine Army nipadala na sa ilang army truck ug ambulance samtang ang Philippine Airforce nipalupad sa ilang duha ka helicopter alang sa usa ka aerial survey.
Nagpasunod usab ang mga rescue vans sa City Disaster Risk Redution and Management Office.
Ang mga kawani sa balay lungsod nahunong ang trabaho ug nagdali pagpanggawas sa City Hall.
Daghan nga mga pasyente ang gikanaog sa nagkadaiyang tambalanan.
Ang mga residente sa Distirict Barangays nakita usab sa taga OCD nga aktibo nga mipatisipar.
Ang mga barko sa pantalan gipalayo usa sa taga Philippine Coast Guard samtang ang mga K9 units gigamit pagpangita niadtong mga natabunan sa mga ni-collapse nga edipisyo.
Gisusi kunuhay sa taga City Building Officials ang mga tunghaan diin luwas na kini nga pasudlan sa mga tinun-an.
Ang City Hall gisusi usab kunuhay ug luwas usab kini trabahoan busa nibalik na ang tanan sa sulod ug balik na usab ang klase sa mga tunghaan.
Gitapos ang 47 minutos nga earthquake drill sa usa ka pagpasidungog. (Superbalita Cebu)