GIPAHIMANGNOAN sa Department of Health (DoH) ang publiko nga magbantay sa mga sakit nga giingong uso panahon sa ting-init o summer ilabi na usab nga dunay nasinating El Nino.

Gitug-an ni Dr. Susana Madarieta, director sa DOH-7, nga ang mga sakit ug health condition nga motumaw panahon sa summer mao ang diarrhea, soreyes, heatstroke, skin diseases, sunburn, ug rabies.

"The Manny Pacquiao Blog". Click here for stories and updates on the Filipino boxing champ.

Gipasabot ni Madarieta nga tungod sa kainit sa panahon, moinit usab ang pamati sa lawas sa mga iro maong magsalimuang kini ug mamaak.

Apan sagad gyud sa motakboy nga sakit panahon sa ting-init mao ang diarrhea gumikan sab kakuwang sa tubig maong giawhag ni Madarieta ang publiko nga siguruhong limpyo ang imnon ug lutog maayo ang pagkaon.

Tungod sa kainit sa panahon, di malikayan ang sore eyes, ug mga skin disease sama sa rashes ug bungang-singot (prickly heat ).

Angayang maglikay sa init ilabi na gikan sa alas 10 sa buntag ngadto sa alas 3 sa hapon aron malikayan ang sunburn ug heat-related condition sama sa heat cramps, heat exhaustion ilabi na ang heatstroke nga moresula gyud sa kamatayon kon di dayon matagad.

Tungod sa kainit sa panahon, dunay posibilidad sa red tide maong di malikayang dunay shellfish poisoning.

Aron malikayan ang sakit, awhag sa DOH nga likayan ang sun exposure, moinom og daghang tubig ug juice, manglimpyo sa palibot, pag-obserbar og proper hygiene bisan pa sa kakuwang sa tubig, pagbutang og lotion nga may sunscreen protection, pagsuot og hayahay nga mga sapot ug kawo o payong kon mogawas. (CPL)