GIPADAYAG ni three-time Olympic gold medalist Carmelo Anthony ang iyang kaandam nga sa makausa pa moduwa alang sa USA Basketball sa umaabot nga 2019 FIBA World Cup.
Apan gitug-an ni USA Basketball Managing Director Jerry Colangelo sa SI.com, nga gibalibaran kini sa team sa katarungan nga ilang gipalabi karon ang bag-ong grupo.
Sa interview, gipadayag ni Colangelo nga dako ang ilang prespeto ni Anthony ug ingon man nakadayeg sila sa natampo niini sa USA Basketball.
Si Anthony nalakip sa team nga milangkat og bronze medal sa 2004 Olympics, ug nalakip usab siya sa Team USA nga mmipupo og tulo ka sunodsunod nga gold medal sa tuig 2008, 2012 ug 2016.
Gibutyag ni Colangelo nga pinaagi sa usa ka representante mihangyo si Anthony nga mahatagan og kahigayonan nga siya makaduwa.
“I love Carmelo,” padayag ni Colangelo. “He made a great contribution. I understand why the request was made. He’s trying to reestablish himself. I think that has to be done in the [NBA].”
Sa kasamtangan, ang 35-anyos nga Anthony, usa na karon ka free agent human girelis sa Houston Rockets. (JBM)