TAGSATAGSANG mipugnit sa ilang unang kadaugan ang University of San Jose Recoletos (USJ-R) Jaguars ug University of Cebu (UC) Webmasters pinaagi sa pagpukan sa ilang mga kaatbang sa pagsugod sa 1st Capt. Kirk Bryan Repollo St. Agustine Cup inter-collegiate basketball tournament nga gipahigayon sa barangay Inayawan Sports Complex, dakbayan sa Sugbo.
Ang Webmasters, third placer sa bag-o lang natapos nga Cesafi Partner’s Cup 2019, nakaipsot sa uwahing rally sa University of Southern Philippines Foundation (USPF) Panthers, 95-88, samtang ang Jaguars miagi una og sikit nga kombati una pa hingpit nga matipi ang Cebu Institute of Technology (CIT-U) Wildcats, 80-77.
Sa pagsira sa first half, nakaposte na og 11 puntos ang Webmasters, 47-36, ug giinat ang labaw niini ngadto sa 76-55 sa pagsira sa third quarter.
Nakapahagsa man tuod og 33-19 nga rally ang Panthers sa fourth quarter, apan kadto mao ray pinakaduol nilang nahimo sanglit nahutdan na usab sila sa oras.
Samtang ang Jaguars ni coach Leodie Garcia, sa ilang bahin, niagi pa og malisod nga dalan sa ilang pagpakigkombati batok sa Wildcats ni coach Edzel Vallena.
Ang Jaguars perming naggukod sa duwa, 17-20, sa first quarter ug 40-41 pagkatapos sa first half. Nakuha sa USJ-R ang labaw diha na sa third quarter, 63-62.
Sa ikaupat nga hugna, nagpulipuli og sakmit sa bintaha ang matag habig nga nakahatag og kahinam sa mga misaksi sulod sa complex hangtod nga nakakita og lungag ang Jaguars nga maoy ilang gihimong agianan aron iselyo ang kadaugan.
Ang torneyo nga maoy usa sa mga kalihukan sa naghinangat nga kapistahan sa barangay natigayon ubos sa pagpaningkamot ni Kapitan Repollo ug sa tanang opisyal sa barangay ug ubos sa superbisyon ni commissioner Edwin Dejacto.
Mga puntos:
Unang duwa:
UC (95) - Sejay 17, Gabisan 16, Menina 16, Jabillo 16, Gravin 13, Manluna 5, Lawas 4, Albina 4, Dela Cerna 4. USPF (88) - Olado 19, Cauba 19, Mendez 18, Swint 10, Chavez 8, Sarahina 5, Langahin 4, Maglasang 3, Patalinhug 2.
Ikaduhang duwa:
USJ-R (80)-Lamana 29, Echavez 18, Gastador 14, Solomon 10, Mendoza 5, Gonzaga 2, Robles 2. CIT-U (77)-Sable 21, Canete 13, Aloro 11, Escalona 9, Jabonero 5, Kong 5, Ventura 3. Quarterscore: 17-20; 23-21; 23-21; 17-15. (JBM)