GIPASALIG sa top official sa Phoenix Pulsse nga way plano ang team nga i-trade ang kontrobersiyal nga si Calvin Abueva, sukwahi sa mikatap nga hugonhugon nga ibalhin kini ngadto sa laing team.
Si Raymond Zorilla, ang team governor sa Phoenxi mihikak nga ang gitawag og “The Beast” gipaubos sa trading block, ug gani nagpaabot na lang sila sa desisyon sa PBA nga maglibkas sa pagkasuspenso ni Abueva nga gipahamtang ni commissioner Willie Marcial.
“He is still under a contract and he is suspended by the PBA,” matod ni Zorilla nga nakutloan og pamahayag kagahapon sa Spin.ph atol sa gihimong pinirmahay tali sa Phoenix ug sa Philippine Sports Commission kalabot sa pagsuporta sa kampanya ni Hidilyn Diaz sa 2020 Olympic.
“Definitely, we are waiting for his reinstatement pending compliance of whatever the Commissioner’s Office has given him,” dugang ni Zorilla kinsa mibutyag nga wala sila magkaistorya ni Abueva ning bag-ohay lang ug wala usab siya ka basa og taho nga i-trade si Abueva.
“I haven’t spoken to him nor have I ever read that tweet. I’m not active on social media. Actually, I haven’t seen that,” ni Zorilla pa.
Si Abueva kasamtangang gisuspenso sa PBA gumikan sa iyang tuyo paglamba sa iyang kumo ngadto sa import sa TNT Katropa nga si Terence Jones niadtong Hunyo atol sa ilang duwa. Nakontrobersiyal usab siya sa iyang pagpakig-away sa uyab ni Rayray Parks, ang rookie player sa Blackwater.
Ning uwahin lang, gipamulta usab siya sa Phoenix human kini miduwa og ligang labaw bisan og aduna pa siyay kontrata, samtang gisuspenso siya sa PBA.
Ang Games and Amusement Board (GAB) mihulga usab sa pag-revoke sa iyang lisensiya sa pagka professional basketball player tungod sa sunodsunod niyang pagkomiter og mga salaod.
Naghatag og laing mantsa sa iyang imahe mao ang pag-akusar sa iyang asawa nga managmal ug manapat, butang nga gihimakak ni Abueva. (JBM)