MATAG usa kanato dunay lain-laing kasinatian para molahutay ang kalipay sa ka-relasyon. Ang uban mahadlok manguyab o makig-relasyon kay taslakan nga di unya magkasinabot unya magkabuwag ra dayon. Apan niadtong nakasuway, di sab matukib ang kalipay nga siya gi-mahal o nagmahal bisag di tam-is ang ending.
Matud ni Stacey Kaiser, usa ka lisensiyadong psychotherapist nga experto sa natad sa relasyon, mas taas ang puruhan nga malipayon ug garantisadong molungtad ang relasyon kon duna ining kina-iyaha:
Respito. Pasabot nga ikaw ug ang imong pares dunay pagtan-aw sa inyong tagsa-tagsa ka mga gusto, kalipay ug panginahanglan una mobuka sa baba o mohimo og aksyon. Kanunay ibutang sa alimpatakan ang pagbati ug ka-ayuhan sa pares.
Sunod kining pagka-loyal. Nindot kaayo ang pamation kon ang imong pares kanunay magpaluyo sa imong kasakit ug kalipay. Kon naa man ugali magpasakit, manaway, o magdaog-daog, anaa siya sa imong kiliran andam ug tagana nga modepensa ug suporta nimo.
Paghatag og importansiya. Aron mosamot ka hugot ang relasyon, ipakita ug ipadayag nga siya imong unahon una ang uban bisag unsa pa ka busy. Ang paggahin og oras ug panahon sa pakig-kukabildo labi na sa iyang mga panginahanglanon ug gusto, dako og matabang. In other words, quality time nga kamong duha malipayon nga magka-uban bisan pa man sa ubang kabilinggan ug obligasyon.
‘Action speaks louder than words’ busa ayaw hikawi imong pares sa pagpadayag sa ang imong gibati. Gamiti og mga pulong ug buhat nga maka-pakita nga imo siyang pinangga. Ayaw pagmakuli ug pagtinihik sa paghatag og halok, mga love notes, buwak, chocolates, o gasa nga makapakita sa imong tinuoray nga pagbati.
Way perpektong relasyon, busa kon moabot ang mga hagit o kalisod, i-focus imong huna-huna ug kasing-kasing sa mga positibong panghitabo ug kasinatian labi na niadtong mga malipayong higayon nga kamong duha nangatawa o ba kaha iyang mga maayo o ma-anindot nga hiyas.