SUKAD niadto pang Dominggo, Agosto 4 nga wa makatabok ang mga taga isla sa Olango, Dakbayan sa Lapu-Lapu padung sa mainland. Ang mga tawo nga gustong moadto sa isla, wa usab makatabok. Nahitabo ni tungod sa gale warning nga giluwatan sa Philippine Atmospheric, Geophysical and Astronomical Services Administration (Pagasa).
Ang kusog nga hangin dala sa hanging habagat gipakusog sa bagyong Hanna.
Si Lapu-Lapu City Mayor Junard “Ahong” Chan nagpatabang na sa Philippine Navy nga ilang adtuon ang Olango aron madala niya ang mga hinabang nga iyang giandam alang sa mga lumolupyo.
Mga duha o tulo pa lang unta ka adlaw, naghimo na og lakang ang administrasyong Chan pinaagi sa paghangyo sa Philippine Coast Guard (PCG), ang mas haom nga ahensiya nga duolon sa ingon niani nga sitwasyon.
Dunay mga barko nga igo nga magamit ang PCG alang ning mao nga katuyoan. Di lang kay kining mao nga ahensya motubag lang kon dunay emerhensya sa kadagatan.
Di usab mabasol ang PCG kon wa sila makahimo og lakang sa pagtabang sa mga taga Olango kay wa may request gikan sa LGU nga maoy mas dunay dakong kaakuhan.
Aron usab di na masubli kining mao nga hitabo taliwa sa naandan nga pattern sa panahon kon ting habagat ug ting-amihan na, ang LGU mag-andam na og malungtaron nga mga lakang agi og panagana. Sama pananglitan sa pagpakigsabot na sa PCG, Navy o pribadong kompaniya nga makaserbisyo sa mga taga Olango kon naa ang susamang panghitabo. Pagkakaron man gud, wa mapangandami kining mao nga panghitabo nga unta, nagbalikbalik na kini kada tuig. Maisip na kining cycle.
Di lang kay kadaut sa panginabuhi ang namugna niini, hulga usab kini sa kinabuhi sa mga taga isla nga isolated kon magdaut ang panahon. Kon wa kini mahimo sa miaging administrasyon, panahon na ni Chan ang paghimog lakang alang sa malungtaron nga solusyon.