KAPIN sa 11,000 ka punoan sa marijuana nga mokabat sa P4.4 milyon ang na-ibot sa City Mobile Force Company CMFC sa Sityo Mapa, Barangay Tagba-o bukirang dapit sa Siyudad sa Sugbo.
Matod ni Police Lieutenant Colonel Randy Korret, hepe sa CMFC sa Cebu City Police Office nga nagpahigayon silag internal security patrol operation sa bukid apan adunay nakahatag nilag impormasyon labot sa marijuana plantation.
Giingong gituyo pag tanom ang maong marijuana alang matod pa kini sa pagtambal sa bisan unsa nga matang sa sakit sa lawas.
“Ang unang sabi nya ginagamit itong marijuana panggamot, nung nakita namin ang volume siguro hindi naman panggamot itong volume yung 11,200 fully grown marijuana.” matod ni Korret.
Wala na dalha sa buhatan sa CCPO ang mga naibot nga punoan sa marijuana tungod sa kadaghan niini ug kalayo sa lugar nga maoy hinungdan nga nakahukom na sila nga didto nalang kini sunogon.
Walay nadakpan nga mag uuma nga nananom niini apan matod ni Korret nga aduna na silay mga pangalan nga posibling nagtanom sa mga punoan sa marijuana.
Gawas sa barangay Tagba-o aduna pa silay gi monitor nga dapit sa bukirang barangay sa siyudad sa Sugbo nga giingong aduna usab kini marijuana plantation.
Wala motug-an si Korret sanglit wala pa usab nila matultuli ang maong lugar apan iyang gibutyag nga duol na kini sa boundary sa usa ka lungsod sa probinsya sa Sugbo.
Daghan ang agi-anan sa bukid nga mahimong makalusot paingon sa siyudad sa Toledo, Balamban, Compostela ug siyudad sa Danao.
Gihulagway ni Police Colonel Gemma Vinluan nga ang pagka diskobre sa mga tinanom nga marijuana tungod sa pagpakabana sa publiko sa ilang palibot. (AYB)