SULOD sa napulo ka adlaw ning bulan sa Agosto, tuig 2019, linaw ang lakat sa kinabuhi ko. Tinuod, ang grasya sa Ginoo matag-adlaw bag-o ug pirming kaigo sa mga panginahanglanon nato-hallelujah!
Ang “providence” mao ang “pagbantay ug pag-atiman nga ginatuohang hinatag sa Diyos. Ang pulong nga “provide” o “paghatag” mao ang kinauyokan niini. Sa mga relihiyosong binuhat, ang ilang “Diyos” mao ang nag-atiman, naghatag kasiguruhan ug nagtagana alang kanila.
Sa nasud Amerika, sikat kaayo ang programa sa telebisyon ni punong hukom, Franceso Caprio nga gitituluhan og, “Caught on Providence.” Ginapakita sa maong hudisyal nga salida ang managkalaing tawo nga adunay sala sa balaud nga gihukman ni Judge Caprio.
Kumpara sa ubang mga hukom, si Judge Caprio naghatag igong konsiderasyon sa iyang mga desisyon.
Busa, halos tanang mogawas sa iyang buhatan nahimong mapasalamaton bisan adunay tulubagon sa balud, igsuon.
Kintahay, dies mil ang multa sa nakasala apan pobre ug problemado kini, himuon ni Judge Caprio nga katunga na lamang ang balayrunon ug “pay when able” pa gayud nga kondisyon. Wow!!!
Dili ba kita pod masulod sa lisod nga mga sitwasyon usahay apan ang resulta sa kinaulahian kay kaayohan diay.
Sama sa akong friend nga giilad sa iyang boypren kaniadto, nagsalimuang mao bisan triathlon giapilan aron makalimtan iyang uyab nga tampalasan nawong morag habul nga kaguran.
Sa kompetisyon nakaila sa akong amiga ang gwapong langyaw nga nahimo niyang bana. Problemado tuod ang sinugdanan apan mas nindot diay ang giandam sa Diyos kaniya sa unahan.
Si Hayden Kho nga karon bana ni Doc Vicky Belo, nagkanayon nga nahimo siyang malampuson sayo ra kaayo sa panahon mao nakaguba hinuon kaniya, igsuon.
Ang iro mabuntis ug mahimong manganak sulod lang sa 63 diyas apan ang elepante 2 years, pare. Dali ra matagamtaman ang mga ordinaryong kadaugan apan sa mga dinagkung panalangin, nanginahanglan og daghang pag-ampo, pasensya, ug pagbansay sa pamatasan ug kinaiya aron dili mahimong pamati, hakug ug garbosa sa dihang succesful na kita.
Dili nato ugatan ang mga kagul-anan sa kasamatangan kay sa unahan, nakatagana ang probisyon sa Ginoo nga seguradong molipay ug motagbaw nato. Amen?