NIABOT na og 11 ka mga tawo ang namatay gumikan sa sakit nga dengue fever gikan sa buwan sa Enero hangtod sa Agusto 3 ning tuiga sa dakbayan sa Sugbo.
Si Dr. Daisy Villa, pangulo sa Cebu City Health Department, nagkanayon nga katapusang nakalas sa maong sakit mao ang taga barangay Capitol Site.
Apan giklaro ni Villa nga kon itandi sa niaging tuig sa susamang mga buwan, adunay ubos nga kaso sa dengue sanglit sa tuig 2019 aduna lay 1,166 kon itandi sa 2,900 sa tuig 2018 apan wa siya nahibawo kon pila ka mga kinabuhi ang nakalas sanglit dili siya ang nagtimon sa CCHD atol sa administrasyon ni kanhi Mayor Tomas Osmeña.
Si Mayor Edgardo Labella nitahas kang Villa sa pagkuha sa detalye sa mga kaso sa dengue sukad niadtong tuig 2017, 2018 ug 2019 ug iduso didto sa iyang buhatan sa labing dali nga panahon para iyang mahimoan gilayon og aksyon.
Apan si Labella nagkanayon nga bisan kon wala pa ang report, ang City Health ug CCMC officials gitahasan na sa pag-apud-apod og testing kit ngadto sa 80 ka barangay para kon adunay mahilantan, mahibaw-an dayon kon gitakboyan ba sa makamatay nga sakit o wala.
Ang City Government ubos sa mando sa mayor, mopahigayon usab og fumigation kon pamaagi sa pagpatay sa lamok nga gadala og dengue ngadto sa mga eskwelahan ug mopahigayon sab sila og pagpanglimpyo ug pagguba sa mga lugar nga posibleng itlogan sa lamok.
Si Labella nipadala na usab og memorandum ngadto sa 80 ka barangay aron I-monitor ang ilang mga residente kinsa gipanghilantan aron masuta dayon pinaagi sa testing kit ug mahatagan dayon og tambal ug giawhag pagreport ngadto sa CCDD.
Ang mayor nagkanayon nga makaalarma ang dengue cases hilabi na nga aduna nay mga namatay hinungdan nga ilang buhaton kutob sa ilang mahimo nga dili na makakuyanap ang maong matang sa sakit.
Wala pa say plano si Labella nga modeklara og state of emergency sa Cebu City hangtod nga dili pa niya makita ang kinatibuk-ang detalye.
Apan iyang gipadayag nga aduna nay deklarasyon gikan sa Department of Health Central Office batok sa maong sakit hinungdan nga iyang giawhag ang katawhan sa paglimpyo usab sa palibot para dili makaitlog ang lamok hilabi na nga panahon na sa ting-uwan. (PAC)