DIGOS CITY -- Giukoy na sa kapulisan ning dakbayan ang mga bugaw nga sagad naggamit og mga menor de edad nga babaye aron nga ilawog ngadto sa mga lalaki nga nangita og lawasnong kalipay.
Kini human nga gipasakaan na og kaso sa Digos City Police Office (DCPO) ang usa ka 21-anyos nga dalaga human madakpan atol sa gilusad nga entrapment operation didto sa Galor’s Restaurant and Inn sa dalang Lim Extension sa Barangay San Miguel niadtong Miyerkules sa gabii, Agosto 7.
Naaktuhan sa kapulisan si alyas Jubee nga maoy nagbugaw og mga menor de edad nga babaye sa lugar aron ilawog ngadto sa mga lalaking kustomer nga nanginahanglan og lawasnong kalipay bugti sa salapi.
Nakig-alayon ang DCPO sa City Social Welfare and Development Office aron maluwas ang mga menor de edad nga nagapanghaylo og “sex” aron sila makakuwarta.
Nasikop ang suspek human gitug-an sa mga molupyo sa lugar ngadto sa kapulisan ang iyang modus operandi.
Narekober gikan sa suspek ang marked money nga P2,000 nga gipaon sa kapulisan sa entrapment operation apil ang cellphone.
Matud sa DCPO nga kasong paglapas sa Anti-Child Abuse Law ug Expanded Anti-Trafficking in Persons Act of 2003 ang atubangon sa suspek.
Nagbahad ang DCPO nga ila pang pakusgan ang pagpangukoy sa uban pang mga bugaw nga naglihok dinhi sa dakbayan. (Orlando B. Dinoy)