DUHA ang patay samtang usa ang nasikop atol sa buy-bust nga joint operation sa Talisay Police Station ug Cordova Police Station.
Nahitabo ang pinusilay tali sa kapulisan ug mga durugista human nga ang target sa operasyon giingong nakipinusilay sa mga awtoridad.
Nahitabo kini sa sitio Tabay, Barangay Cansojong, sa Syudad sa Talisay alas 12:45 sa Sabado sa kaadlawon, Agusto 10.
Ang mga namatay giila nga sila si Jorge Malinao ug usa ka Dixon ‘Dickson’ Pacaldo.
Si Malinao subject sa operasyon, samtang giingon nga iyang sinaligan si Pacaldo
Ang nisurender paglabay sa pipila ka minutos mao si Rolando Dacayana, hingkod.
Matod ni Police Major Orlando Carag Jr., hepe sa Talisay City Police Station, alas 12 sa tungang gabii, niabot ang mga sakop sa Cordova Police station sa ilang buhatan.
Nakig-alayon kini kanila human nasusi sa Cordova Police ang nadawat nila nga impormasyon gikan sa usa ka Michael.
Si Michael giingong nitumaw sa Cordova Police Station ug nisaysay sa ilegal nga kalihukan ni Malinao.
Gituyo sa impormante nga sa Cordova Police isumbong ang iyang nahibaw-an aron di mamilegro ang iyang kinabuhi ug di mabulabog atol sa operasyon.
‘Pinusilay’
Dugang ni Carag nga sa dihang nakontak ug nakig-transact na sila sa grupo ni Malinao, ug sa pagsulod sa mga operatiba sa lugar, giingon nga ang mga suspek nakabantay nga mga pulis ang ka-transaction.
Giingong unang nipabuto sa ilang mga armas ang grupo ni Malinao.
Nibawos ang mga pulis ug gibana-bana nga nilanat og 20 minutos ang pinusilay.
Nahunong ang buto-buto sa armas hinungdan nga nagpatawag ang mga pulis sa Talisay Rescue Emergency Action Team (TREAT), nihiling sa lawas sa mga suspek.
Apan nimando ang mga pulis sa mga sakop sa Treat nga mopalayo kay adunay nilihok sa may tubigan nga napuno sa water lilly.
Didto na nitumaw si Dacayana, kinsa ni-surrender pinaagi sa pag-isa sa iyang mga kamot.
Gitug-an ni Carag nga ang operasyon iya sa Cordova Police pinanguluhan ni Police Captain Efren Diaz ug nga sila sa Talisay Police igo lang mitabang sa Cordova Police aron mahimong magmalampuson.
Nihimo pa usab og pakisusi ang Talisay Police sa background ni Malinao, Pacaldo ug Dacayana, kon daan na ba kini nga anaa sa ilang watchlist o newly identified ba.
Gisusi usab kon unsa na kadaku ang distribusyon sa grupo ug kon unsa nga drug syndicate kini konektado.
“Inaalam pa namin. Sa Corodova Police kasi ito na operation, they just coordinated sa atin,” saysay ni Carag sa Superbalita Cebu.
Nakuha sa crime scene mao ang duha ka .38 nga revolver ug mga bala.
Nasakmit usab ang 42 ka mga gagmay nga pinakete sa gidudahan nga shabu, mga drug paraphernalia.
Danao
Duha ka mga lalake nga naa sa drug list sa kapulisan sa Dakbayan sa Danao nasikop niadtong Biyernes sa hapon, Agusto 9.
Ang mga nasikop nakuhaan og shabu nga mokantidad og P714,000.
Mga suspek nga nasikop sa Upland Suba giilang sila si Joseph Franco ug Alex Pradia.
Ang duha nakuhaan og 105 gramos sa shabu.
Kalapasan sa Republic Act 9165 o ang Comprehensive Dangerous Drugs Act of 2002 ang atubangon nga kaso sa duha. (Dugang taho ni HBL)