HUGOT ug higpit nga panagtigi ang gipaabot nga masaksihan karong buntag sa dihang, sa makausa pa, mosikad na usab ang Regent Aguila Ironman 70.3 diha sa Shangri-La Mactan Resort and Spa sa dakbayan sa Lapu-Lapu.
Kini human nga mobalik sa pagsalmot si Terenzo Bozzone sa New Zealand, ang unang kampiyon sa maong international competition, aron hagiton ang katakos sa mga bag-ong kampiyon nga sila si Mauricio Mendez sa Mexico ug Tim Reed sa Australia.
Onse ka tuig ang nakalabay, si Bozzone maoy midominar sa 2008 Ironman 70.3 nga niadtong panahona gipahigayon sa Camarines Sur apan tungod sa angol sa iyang kiting wa na kini makasalmot pa sulod sa hataas nga panahon.
Misuway unta og balik sa niaging tuig ang 34 anyos ga Bozzone apan nakaangkon na usab og laing injury sa dihang nasaghiran kini og sakyanan samtang nagbiseklita haduol sa iyang balay didto sa Kemeu Aukland.
Sa usa ka press conference, gipadayag ni Bozzone ang iyang kahingawa nga nakabalik na sa kompetisyon ug iyang gikalipay ang paghangop sa mga Pinoy nga iyang gihulagway nga mga maayo ug maabi-abihon nga mga tawo.
Iyang gipanghinaot nga gusto man tuod niya nga malangkat ang titulo apan iya usab nga giangkon nga lisod kini nga misyon tungod sa kalidad usab sa iyang mga kaatbang.
Si Mendez, ang defending champion, nag-edad og 23 anyos, samtang si Reed, ang 2016 world champion, motangkod nga 34 anyos na usab.
Sa women’s division, ang paglangkat sa ikaunom nga titulo maoy anaa karon sa alimpatakan ni title-favorite Caroline Steffen sa Switzerland. Niamag ang kadaugan ni Steffen human masayri nga dili makadepensa sa iyang titulo ang kampyon sa niaging tuig si Radka Kahlefeldt sa Czech Republic tungod usab sa angol. (JBM)