MODUWA nga dihado ang multi-titled University of the Visayas (UV) Green Lancers sa 34th Kadayawan Sports Festival Invitational tournament nga sugdan karong adlawa sa Almendras Gym Davao City Recreation Center.
Kini tungod kay wala ang ilang import nga si Lass Coulibaly ug ang laing bigman nga si Michael Maestre.
Si Coulibaly nga usa ka Muslim, dili makaduwa tungod sa Eid al-Adha, ang tinuig nga kasaulogan sa ilang relihiyon, samtang manganakay usab ang asawa ni Maestre.
Ikasangka sa Lancers sa opening day sa upat ka adlaw nga tournament ang National University sa Manila.
Wala usay kasiguroan kon mahikuyog ba ang headcoach sa UV nga si Gary Cortes kinsa atoa pa sa Kaulohan alang sa personal nga katuyoan.
Ang Lancers migikan kagahapon paingon sa Davao City.
Mopakita usab og aksiyon sa tournament ang 2019 Cesafi Partner’s Cup champion Southwestern University-Phinma Cobras. Ang Cobras mosakbang sa defending champion De La Salle University Green Archers sa unang adlawa.
Gipaabot nga motambong sa opening ceremony si Mayor Inday Sara Duterte-Carpio ug Vice Mayor Sebastian Duterte, Congressman Pulong Duterte uban ni SBP-XI regional director Glen Escandor, SBP regional operations head Ronnel Leuterio ug SBP regional commissioner Atty. Francis Calatrava.
Ang champion mosakmit sa P100,000 nga cash prize, samtang P60,000 alang sa runner-up. P40,000 ug P30,000 ang mabulsa sa 3rd ug 4th placers. (JBM)