WA MOKAGAT ang import sa TNT Katropa nga si Terrence Jones sa patutsada ni Chris Ross sa San Miguel Beer kinsa mitawag kaniya nga morag “bata” human sa Game 3 sa PBA Commissioner’s Cup finals niadtong Biyernes sa Araneta Coliseum.
Si Jones nakakita na usab og panagbanig sa maong duwa human maigo sa iyang headbutt si Ross sa tungatungang bahin sa first quarter sa maong duwa diin gipildi sa TNT ang San Miguel, 115-105, aron sakmiton ang 2-1 nga bintaha sa series.
Tungod sa hitabo, gipahamtangan si Jones og flagrant foul samtang technical foul usab ang gisilot ni Ross.
Sa dihang gikuhaan og pamahayag human sa duwa, si Ross mibirada gilayon sa import ug mihingan niini nga bata ang hunahuna, pasabot way buot.
Apan wala kini panumbalinga sa kanhi sakop sa Houston Rockets, ug imbis masuko iya hinuon gidayeg ang iyang mga local nga kauba nga sila si Jayson Castro, Troy Rosario, Roger Pogoy ug Don Trollano.
“I don’t know. I don’t have too much to say about that,” matod ni Jones nga nakutloan sa Spin.ph. “I’m trying to win, game by game, and we did that today. We just try to move forward and win Game Four.”
Ang Game Four duwaon karong gabii ug anaa karon sa alimpatakan ni Jones ug sa tibuok Katropa ang pagpalapad sa ilang bintaha, 3-1, sa series.
Wa usab mohatag sa iyang habig si Jones kon inarte ba ang gihimo ni Ross ug ingon man ang siko nga iyang nadawat gikan ni Christian Standhardinger sa second half hinungdan nga gitawagan og flagrant foul 1 ang bigman sa Beermen.
Gumikan niini, gituohan nga laing physical nga panag-engkuwentro ang masaksihan sa Game Four karong gabii.
Sa iyang bahin, giangkon ni coach Leo Austria sa San Miguel nga ang kapugdol sa ilang depensa ug opensa sa second quarter maoy naghatag og marka sa ilang kapildihan.
Gidominar na unta nila ang first quarter sa dihang nakaposte sila og 17 puntos, 36-19, sa unang kuwarter apan sa kalit lang miawop sila sa ikaduhang hut-ong.
Duha gyud ka timeout ang iyang gihimo sa atol sa rally sa TNT, apan wa kini makapausab sa dagan sa duwa.
“Doon medyo nawala na kami,” angkon ni Austria. “A little bit of panic siguro nung nakahabol sila. And then in the second half, they were able to control the game. I think that’s one thing na kailangan ma-solve ulit namin.”
Dihay higayon nga misikit na unta sila og napakubsan ang labaw sa TNT ngadto sa tres puntos na lang, 91-88, apan ang sunodsunod nga tres nila ni Don Trollano ug RR Pogoy maoy nagbingat og balik sa labaw sa Katropa, butang nga wala na mabawi pa sa Beermen.
Ang Sugboanon nga Pogoy maoy nahimong best player of the game nga may 29 puntos.
Mga puntos:
TNT (115) - Jones 37, Pogoy 29, Trollano 18, Castro 14, Rosario 13, Heruela 4, Washington 0, Golla 0, Taha 0, Carey 0, D. Semerad 0, Casino 0, Magat 0.
San Miguel (105) - McCullough 27, Fajardo 27, Romeo 13, Pessumal 12, Santos 10, Standhardinger 8, Ross 5, Cabagnot 3, Rosser 0. (JBM)