HAPON sa Hulyo 25, 2019 sa tugkaran sa balay sa pamilyang Capao sa Poblacion, lungsod sa Tudela sa Camotes Island, Cebu, 50 ka mga bata ang gapunay og katawa ug kiat.
Imbitado sila sa first birthday party ni Aristotle Solante Capao III, anak ni Arianne Capao ug apo nila ni Toton ug Polilit Capao.
Mao pa tuy unang higayon nga nakatambong sila og birthday party nga adunay clowns, mga duwa, packed meal, ice cream, daghang balloons ug loot bag. Ang loot bag gisudlan og daghang chocolates nga mao pay ilang pagtilaw.
Alang kanila, fairytale ang birthday party ni Aris Tres.
Apan si Aris Tres, didto ra gatan-aw sa lechon nga gitadtad kilid sa buffet table.
Dungan og birthday si Aris Tres ug ang iyang Lola Flory Solante, 64. Apo na sa tuhod ni Lola Flory si Aris Tres.
Kay gatapad ra man ang mga balay nila ni Toton ug Polilit ug ni Lola Flory, tibuok adlaw sa Hulyo 25 ang selebrasyon.
Ang paniudto, didto ilang Lola Flory. Ang panihapon, didto ilang Toton ug Polilit.
Matod ni Arianne, maihap ra sa iyang mga tudlo ang mga bata sa kasilinganan mao nga nangimbitar siya og mga bata sa laing dapit.
Wa man tuod kaila si Aris Tres sa iyang mga batang bisita ug wa pud sila kaila kinsa si Aris Tres, ila kining gikantahan og happy birthday sa ilang kinadak-ang tingog.
Si Arianne, kinsa nakakita sa kalipay ug kalingaw sa mga bata, nagpasalamat sa Ginoo sa mga grasya nga iyang nadawat, labi na sa kinadak-an ug kinanindotan nga grasya nga gitawag og Aris Tres.
Iyang gi-greet iyang anak sa Facebook: “Happy birthday, Pisot!” (MPS)