Vallena: World class

TAUDTAUD na kong nahunong sa pagsikad. Katapusan nakong tindak niadto pang Mayo. Mga hapit na tulo ka buwan kong nakapahuway og tungas. Niadtong Dominggo, nitindak ra ko kay nagpalit og para paniudto. Grabeng kutasa og sikad. Samot na kagahapon sa Sabado, ang kutas way kabutangan kay nag bike-to-work man ko.

Nagsige lang ko og plano nga mosikad, apan wa matigayon tungod kay nisuol ang tapol. Labina gyud nga nagsige og uwan. Makatulo na ka mga higayon nga napalaw ang akong planong pagsikad tungod sa pagbunok sa uwan.

Kagahapon, ako na lang gidayon ang planong pagsikad padung sa trabaho ug pag-uli. Maayo gani kay di kaayo huot ang kahimtang sa trapiko. Dali ra kong nakalusot lusot. Apan sa ako nang giingon, lahi na ang kahimtang sa trapiko kaniadto ug karon.

Kon kaniadto pipila lang ka motorsiklo ug scooter ang mo-filter, karon grabe na kadaghan. Ang filtering man gud, bisan ilegal, apan maoy labing luwas nga paagi sa paglusot sa transportasyon nga duha ang mga ligid. Namatud-an na kini sa mga pagtuon. Busa, maayo unta nga dunay balaud sa trapiko dinhi sa nasod nga magtugot niini.

Mingaw

Posibleng mingaw ron sa kabukiran sa mga mountain biker tungod sa Ironman 70.3. Kasagaran sa mga mountain biker karon nag-marshal sa labing dako nga sporting event sa Sugbo. Hapit tanang tawo usab karon naa sa karsada aron makakita sa ilang paboritong mga artista nga nangapil sa triathlon.

Naninguha kanunay ang organizer ug local government units (LGU) nga anhi sa Sugbo mapahigayon kining tinuig nga event. Qualifier kini sa mas dako nga Ironman event nga ipahigayon sa Estados Unidos.

Nangapil na kanunay dinhi ang international triathletes. Ganahan sila dinhi sa Sugbo.

Apan tan-awa ra gud kon duna ba kitay mga pasilidad diin ang atoang mga triathlete makapraktis unta nga luwas, labina sa biking event. Wa kita niana nga pasilidad.

Maanindot unta nga portion sa South Road Properties (SRP) himuon nga training ground sa cycling. Dako na kaayo og ikatabang kon dunay four-kilometer loop diin ang atoang mga cyclist luwas nga maka-ensayo.

Kuyaw

Ang mga atleta karon naa sa kakuyaw magtindak tungod kay makigkompetensya sa mga sakyanan sa dalan. Maayo ra bag ordinaryong mga sakyanan. Kompetensya mao ang gatusan ka mga bus ug trak nga way kulba nga padaganon sa mga drayber.

Hinaut pa nga pangitaan kini og paagi sa kagamhanan. Kay kon duna lang kitay saktong pasilidad, segurado nga maka-produce kita og world class triathlete sa umaabot.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph