Mongaya: Panahon na ni Totol?

DUNAY mga preskong ideya alang sa kalambuan sugod pa kaniadtong 2001. Gani, hilom siyang nagpaluyo niining proyektong mo-supply og tubig gikan sa lungsod sa Carmen. Hilom sab siyang niduso sa gitukod karon nga taytayan nga mosumpay sa lungsod sa Cordova ug Syudad sa Sugbo.

Daghan pa ang mga proyektong iyang gitabangan apan dili lang siya gustong mahibaw-an ang iyang dakong papel. Mas dagko kining maong mga proyekto kay sa nianang flyover ni kanhi kongresista ug karong Konsehal Tony Cuenco diha sa eskina Vestil ug ang underpass ni Kong. Bebot Abellanosa diha sa eskina F. Llamas.

Lalim bay siya man ang gitugyanan sa Metro Pacific nga matukod kining taytayan nga gitawag og CCLEX kun Cebu-Cordova Link Expressway.

Dili sayon kini lang pagkumbinser sa mga nagkabanging mga lider sa Syudad sa Sugbo sugod kaniadtong panahon ni Mayor Mike Rama ug Mayor Tomas Osmena. Tuod man, nainagurahan gyud ang maong proyekto kaniadtong 2017 ug nianhi sa Sugbo si Presidente Rodrigo Roa Duterte.

Kay target nga humanon kini karong 2020, makita nato matag agi sa SRP viaduct ang paspas nga trabaho sa maong proyekto. Tuyo nga magamit na kini karong 2021 nga maoy ika-500 nga sumad sa makasaysayong pag-abot ni Ferdinand Magellan dinhi sa Sugbo.

Ug mangutana ko? Nag-epal ba ang Totol Batuhan kabahin sa iyang papel nga madayon kining maong proyekto? Ang atong nailhan nga bida mao sila si Kalihim Adi Sitoy ug kanhi mayor Tomas Osmena.

Nasiguro ko nga mas daghan pang mahimo unta alang sa south district. Apan katulo na nilansar si Totol Batuhan alang sa pagka kongresista sa habagatang distrito sa Syudad sa Sugbo. Katulo sab siya napakyas.

Demalason ba lang kini si Totol? O wa lang gyud makaila kaniya ang mga botante sa habagatan sa Syudad sa Sugbo?

Kay unsaon man sab kining Totol nga di man gustong manghambog sa iyang kakayahan ug mga nahimo. Di sab gusto moapil anang kanta-kanta ug sayaw-sayaw sa stage inig panahon sa kampanya.

Di siya pareho ni Budots nga nakadaog tungod lang anang sayaw-sayaw bisan pa og grabing namantsahan ang pangalan tungod sa pangurakot.

Mas ampay ni Totol ang hilom nga motrabaho alang sa mga proyektong makaayo sa lungsod. Mas malipay siyang makakita nga nakatabang siya kay sa anang magsigig epal kabahin sa iyang nabuhat.

Tungod niini, nakaingon ko nga wala gyud siyay dag-anan batok sa pamulitika nilang Kong. Tony ug Kong. Bebot kaniadtong 2001, 2004, ug 2013. Apan di na man modagan silang Tony ug Bebot karong 2022. Maglisud na si Tony kon one-on-one ang bugno. Last term na sab si Bebot.

Mao nga nakapangutana ko karon. Panahon na ba ni Totol Batuhan?

Naa lang koy nakitang problema. Human sa piliay sa 2013, nisaad na kini siya sa iyang asawa nga dili na modagan pa. Kon duna may lalaki nga motuman sa iyang saad labi na sa asawa, mao kini si Totol.

Gawas pa, daw natagam na kini sa klase sa pamulitika nga tradisyonal diin mas pili-on ang mga kandidatong magkanta-kanta ug magsayawsayaw kay sa kandidatong seryusong maghisgot og isyu sa katilingban ug mopalambo sa distrito. (@anol_cebu sa Twitter)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph