DILI pa lang dugay, mimando si Presidente Rodrigo Duterte sa tanang mga empliyado ug opisyal sa gobiyerno nga anha maniudto sa ilang buhatan. Kini aron sila makabalik dayon sa pagserbisyo human sa ilang paniudto. ‘Dili ko gusto nga ang mga directors mogawas sa ilang buhatan panahon sa paniudto. Diha mo- mokaon sa inyong buhatan aron makabalik dayon mo sa inyong mga tagsa-tagsa ka mga trabaho,’matod pa sa Presidente.
Tipik ug kabahin gihapon kini sa kampaniya sa iyang administrasyon alang sa mas paspas nga transaksiyon sa mga buhatan sa kagamhanan. Una niini, makadaghan na nga higayon nga gipamulong sa Presidente nga dili angay nga dugay-dugayon ang mga transaksiyon sa kagamhanan kay dinhi magsugod ang korapsiyon.
Gani karong bag-o, iya na usab kining gisubli atol sa iyang State of the Nation Address (Sona) nga gikinahanglan nga humanon ang mga transaksiyon labi na ang pagkuha og mga permits sa mga local government units sulod lamang sa tulo ka adlaw. Hatagan og checklists ang mga aplikante nga ilang i-comply ug sultihan kon kanus-a pabalikon aron kuhaon na ang aprobadong permits. Mao ni gi-ingon nga ‘serbisyo hora mismo’.
Balik ta sa paniudto. Matuman ba kaha kini? Pagkadaghang mga regional directors o mga division chiefs nga dili igkita sa ilang mga buhatan kay toa maglaroy-laroy sa gawas. Naa sa silang mga buhatan naka-paskin nga ‘no noon break’. Apan inig adto nimo sa mga government offices, walay mga empliyado nga mo-atiman kanimo kay wala diha naniudto, toa sa gawas. Ang uban namawong og suga kay nangatulog sa ilang mga lingkuranan.
Dugay naman ning kampaniyaha sa Civil Service Commission nga ‘ngayon na bago mamaya na’. Buot ipasabot nga karon dayon atimanon ang publiko ug dili unya-unyaon. Pero natuman ba ni? Wala. Naa pay ubang mga empliyado, arogante kaayo. Kusog kaayong mangasaba sa mga tawo nga mo-transact sa ilang buhatan. Ang uban padug-on o kilkilan pa ang mga kliyente sa dili pa atimanon. Pagka-way ayo. (bobbygnalzaro@gmail.com)