SUNOD-SUNOD na ang gipangpatay sa Tagum City, butang nga makaalarma na seguro sa pamunoan sa Police Regional Office (PRO) Davao Region kay mosantop sa hunahuna sa katawhan nga unsa kahay gihimo sa kapulisan?
Labi na sa pagsugod og kabulyaso sa pipila ka mga money investment schemes, didto na sab nagsugod ang pagkahay-ad sa mga biktima.
Nabutang dayon sa hunahuna sa katawhan nga kadtong mga suspek maoy alegasyong mga investors nga nasuko sa pipila ka mga empleyado sa mga investment schemes.
Puwera sa ubang investors nga nagpaila gayod sa pagka “risk-takers” kay lagi, nasayod na kung unsay kapaingnan pag-abot sa panahon kay kini sugal.
Wala hinuon nagpamatuod nga mga investors ang mihimo, maong nagpagula og pamahayag ang PRO-Davao nga sagad sa mga gipamatay walay kalabutan sa mga investment schemes.
Kung kini unsa kaha’y hinanaling aksyon sa kapulisan sa PRO-Davao nga perte mang paspasa sa pagtaas sa ihap sa mga gipamatay sa Tagum City? Giingon nga pulos personal nga bangi ang gitudlong motibo sa krimen.
“Walang kinalaman sa mga money investment schemes ang nangyayaring mga shooting incidents sa Tagum kamakailan, kun di mga personal grudges ito,” tipik sa giingon ni Police Major Jason Baria, tigpamaba sa PRO-Davao.
Hinuon gipalawman sa kapulisan sa Davao Region ang pagpahigayon sa imbestigasyon ning kasamtangan.
Naglaum ang katawhan nga tinud-on kini sa kapulisan diha sa gipasiatab nga aksyon, di lamang taman sa spot report ang hitabo, kon di sa pag-ila ug pagsikop sa mga mamumuno.