PAGHAKOT sa basura, baha ug pataka og parking maoy pipila ka hilisgutan sa komunidad nga gituki sa usa ka organisasyon sa mga negusyanteng Filipino-Chinese nga nakigtagbo kang Cebu City Mayor Edgardo Labella niadtong Biyernes, Agusto 9, 2019.
Apan ila usab nga gisaad ang ilang suporta kaniya ug sila niingon nga mahimo ra silang masangpit alang sa ilang tabang.
Sa labing unang higayon niyang pakigpulong atubangan sa Cebu Filipino-Chinese Chamber of Commerce (CFCCC), si Labella nidasig sa mga negusyante sa paghatag kaniya og mga sugyot unsaon sa pagsulbad sa mga suliran nga nagkinahanglan og dinaliang pagtagad kay di siya makahimo nga siya ra.
Ang CFCCC niimbetar kang Labella sa ilang regular nga meeting, nga gitambungan sa daghang mga miyembro.
Gipresentar ni Labella ngadto sa mga negusyante ang iyang action plan pinaagi sa PowerPoint.
Iyang action plan naglangkob sama sa kahimtang sa negusyo, suporta sa kapulisan, garbage, drainage, edukasyon ug imprastraktura.
Sa solusyon sa drainage ug pagbaha, matod sa mayor nga dunay himuon nga lapad nga drainage plan aron pagtubag sa problema di lang sa Siyudad sa Sugbo, apil na ang kasikbit nga mga siyudad.
Kay di man kini madali, si Labella niingon nga ang dinalian nga lakang mao ang lapad nga dredging ug desilting sa kasapaan ug uban pang mga agianan sa tubig. Nagpadayon kini karon, dugang niya.
Sa garbage collection, ang City Council nipalabang og supplemental budget aron makakuha og pribadong garbage hauling nga kompaniya, matod ni Labella.
Laing suliran nga gihisgutan sa CFCCC mao ang pataka og parking.
Bisan tuod kon wa pay opisyal nga deklarasyon, pipila sa ilang mga miyembre nipadayag og suporta sa balaudnon nga nagdili sa mga tawo makapalit og sakyanan nga way garahe nga maparkingan.
Giangkon ni Labella nga ang “parking has become a social problem.”
Iyang gipahibawo ang CFCCC sa iyang plano sa pagtukod og upat ka andana nga tenement buildings sa Barangay Lorega.
Usa ka land developer gikan sa Manila federation sa mga negusyanteng Insik, kinsa nitambong sa tigom, nitanyag og tabang kang Labella aron matuman ang iyang plano.
Si Labella, kinsa kanhi ombudsman, nisaad usab nga makiangayon ang iyang pagtagad sa mga negusyanteng Filipino-Chinese.
Nagpaabot siyang sila motuman sa balaud, ug “I will never be biased for or against a businessman.”
Iyang gihulagway ang iyang pangagamhanan nga “ego-less” ug siya niingon nga siya di “vindictive, arrogant and egotistic.”
Mapaubsanon siyang niangkon nga di sila makapaabot nga iyang sulbaron ang mga problema sa siyudad, ug siya nanguhag mga sugyot alang sa solusyon gikan kanila.
“We are all civic-minded people. We will help you,” matod ni Francisco Benedicto, CFCCC president ug retired ambassador, sa pagtapos sa tigom tali kang Labella.
“Cebu City is lucky to have you as mayor,” matod ni Benedicto.
Laing gihisgutan ni Labella mao ang mga lakang sa iyang administrasyon may labot sa negusyante, sama sa: renewal sa business permit nga himuon lang matag duha ka tuig, pagbayad sa buhis agi sa mga bangko, dinaliang pag-release sa building permits, business permits ma-release sud sa 24 oras ubos sa kondisyon nga ang aplikante motuman sa regulatory requirements sud sa 60 ka adlaw ug pagbutang og one-stop shop sa mga transaksyon sa Cebu City. (MPS)