SECTIONS
Monday, September 16, 2019
SUPERBALITA DAVAO

Publiko giawhag nga batukan ang dengue

DAVAO DEL SUR -- Miapela na ngadto sa publiko ang Provincial Health Office (PHO) sa probinsiya nga himoon gyud ang 4S (Search and Destroy, Self-Protection, Seek Early Consultation, and Support Spraying) aron batukan ang pagkuyanap sa dengue.

Nanawagan ang PHO sa mga lokal nga gobyerno nga pangunahan ang kampanya pinaagi sa pag-awhag sa publiko nga manglimpyo sa palibot.

Subay sa datos sa PHO niadtong Hulyo 32, moabot na sa 1,129 ang mga gisuspetsahan nga kaso sa dengue gikan sa nagkadaiyang ospital sa probinsiya.

Sayo ning semanaha, mihimo og tigum ang mga department heads sa kapitolyo, kuyog si Provincial Health Officer Jona Masongsong, kinsa nagbutyag nga adunay unom ka mga namatay, duha niini sa siyudad sa Digos, duha sa Kiblawan ug tag-usa sa mga lungsod sa Bansalan ug Sta. Cruz.

Gipailawom na sa “alert threshold level” ang probinsiya hinungdan nga gikinahanglang molihok ang mga establisemento, tunghaan ug barangay sa paglimpyo sa palibot.

Gipadalhan na sab og mando sa kagamhanang probinsiyal ang mga lokal nga gobyerno aron pahingusgan ang 4S.

Mismong ang PHO ang nanghatag og mga libreng Rapid Dengue Test Kits sa mga munisipyo sa Davao del Sur.

Nasayran nga ang Department of Health nanghatag og 45 kahon sa mga insecticides ngadto sa mga munisipyo ug sa siyudad sa Digos City.

Giawhag sa maong ahensiya ang publiko nga mogamit og mga moskitero, magsul-ob og long sleeves ug pantalon o pajama sa pagkatulog aron di mapaakan sa lamok.

Gihangyo sa mga opisyal ang mga magtutudlo sa mga tunghaan nga moapil pagpahinumdom sa mga ginikanan ug tinun-an. (Orlando B. Dinoy)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph