MITUGPA sa Southern Philippines Medical Center (SPMC) ang usa ka 20-anyos nga ulitawo human gitabangan og kulata sa 30 ka mga tawo nga nakadungog sa yabag niyang tingog.
Una niini, nalingaw og kanta sa videokehan sa Barangay Lizada, Toril, Davao City si alyas Romeo (bansagon gitago), trabahante sa usa ka tindahan sa lugar, ug residente sa Cotabato City.
Alas 9 sa gabii niadtong Biyernes, Agosto 9, natugaw ang pagkahinanok sa pipila ka mga silingan nga nangatulog na ug sa mga estambay sa dapit dihang alingog-ngog kaayong paminawon ang tingog ni Romeo sa videokehan.
Dihang sa pagsuta, nag-abot ang kalalakin-an sa videokehan hinungdan nga gitabangan kini’g kulata.
Nadamay pa sa pagkulata ang duha ka mga higala sa biktima kinsa anaa sab sa ilang pagkanta apan nakadagan.
Human sa hitabo, daling nanagan ang kalalakin-an samtang nakaangkon og mga bun-og sa kalawasan ang biktima kinsa mituy-od na lang kini ug wala na kabangon hinungdan nga gidala ngadto sa SPMC.
Kapulisan sa Toril Police Station padayong mihimo og imbestigasyon sa hitabo, aron maila ang mga responsable.