BAGUIO

Luzano: Dengvaxia… Nakariing manen a kontrobersiya!

Karit Ken Kayetket

BINMANGON manen a kasla bangkay ti isyu ti Dengvaxia gapu iti iyaadu ti kaskaso ti dengue iti sapasap a pagilian. Ti kasal-itan a kontrobersiya ket ti kiddaw a rumbeng kano a maaramat koma manen ti Dengvaxia kontra dengue. Sinalbag,sakuntip ti kaadduan.

Nagadu lanngaruden ti pimmusay gapu iti dengue a di met nasalbar ti Dengvaxia...isublim manen? Ta sinno aya ti nangisingasing? Ay ket sinno pay koma, pards? Ti mismo a nakassuan gapu iti illegal a pannakaaramat ti Dengvaxia a nangibunga iti adu a sinnupiat ken sigalot iti gobyerno.

Ngem saan a basta maipatungpal ti singasing a nakuna agsipud iti kinaadu dagiti mabalin a manglapped. Umuna, masapul a mapaneknekan a pudno a makatulong ti nakuna a bakuna kontra dengue.

Maikadua, apay a naibakuna ti Dengvaxia kadagiti dipay tinamaan iti dengue idinto ta ammoda a daytoy ket illegal ken delikado iti salun-at dagiti nabakunaan?

Ala, sige, pards...adu pay a basnot ti intay isaluket panggep iti daytoy...ngem sakbayna...intay man pay basnotan dagiti sumagmamano met a kontrobersiya iti napalabas:

***

Gapu iti trahedya a napasamak sadiay Guimaras, Iloilo itay nabiit...nasaem manen palek daytoy kadagiti kailiantayo dita.

Nasurok tallupulo katao ti pimmusay gapu iti di napakpakadaan a didigra. Adda ditan ti imbungana nga adal no ania dagiti rumbeng a maaramat ken annuroten iti dayta a negoyso.

Adu ti limtuad a rinnisiris iti laing ken suhestiyon tapno dinton maulit pay ti trahedya. Mismo a ni President Duterte ti personal a napan nakipagrikna kadagiti biktima ken nangamiris iti pannakapasamak ti nakuna nga insidente. Ti nakaladladingit ket ti panagsasaruno dagiti pasken.

Iti pannakaisursurat daytoy a Karit....manarimaan pay laeng a begbegbegen ti bagyo a ni Hanna ti Batanes nangruna sadiay Itbayat a nakaro a naginggigined ken nakatayan ti adu a biktima.

Dida pay nakabangon ngem gimmiddan manen ti sabali a trahedya.

Tsk tsk...malagipko manen daydi lolok. Sangka-kunana idi a masapul kano ti panagalerto agsipud ta no kumna ti malas, dika mapakpakadaan.

Kasta ngamin kano a dimteng iti biagna ti trahedyana – idi pinikot daytoy daydi lolak a nainginaw iti bunganga ti shot gun. Iti ababa a pannao...iti aniaman a panawen, masapultayo ti kired ken napartak ken bukod a pangeddeng. Unaem ti bagim sakbay nga agmulagatka iti aglawlaw.

***

Ita a bulan...mapan manen sadiay China ni President Duterte. Sapay koma kano ta mapagsaritaandan ti isyu dagiti kontrobersiya a teritoryo dita West Philippine Sea.

Ti ngamin kaudian nga eksena...adda ballaag ken takder ti pagilian kontra kadagiti armado a puwersa dagiti gangannaet.

Pinasarunuan met ti DFA babaen kenni Secretary Locsin nga amin koma a ramit-militar wenno barko a pang-giyera a lumabas iti EEZ wenno Exclusive Economic Zone ti pagilian ket rumbeng nga agpakada sakbay a sumrek wenno lumabasda dita.

Daytoy ket kasaruno met ti pannakaungkat ti maysa nga isyu nga adda kano dagiti research vessels ti China ti nasaripatpatanda iti sakup ti Pilipinas iti no namin-ano a daras.

Ngem no maipatungpal ti takder ni President Duterte...di rumbeng a makadappat dagiti gangannaet iti teritoryo ti pagilian nangruna no dagitoy ket armado.

Saludsod: apay kano a saan a napawilan ti U.S. warship (Navy’s Strike Group) USS Ronald Reagan a simmanglad ditoy pagilian itay nabiit para kano iti port call mission.

Daytoy ket dimmagas ditoy pagilian kalpasan iti napasamak a U.S.-Australian bilateral exercise Talisman Sabre. Immuna a bimmisita ti nakuna a barko ditoy pagilian idi Hunyo 2018 ken naammuan a nangrugin ti deploymentna para iti Indo-Pacific Region.

Saludsod latta: saan ngata nga agpeggad ti kasasaad ti Pilipinas iti panagbisita dagita a barko-de-giyera ti Estados Unidos agsipud ta awatentayo ti kinapudno nga agsipsiput met kadatayo ti China?

***

Korapsiyon...daytoy ti nagsentruan ti landok a gemgem (kamay na bakal) ni Pres. Duterte itay kallabes.

Kas naikarina...dinto agsardeng daytoy ken dinto sumuko agingga iti marpuogna ti korapsiyon iti amin a suli ti gobyerno ti pagilian.

Nakunana a kagiddan ti ballagna kontra korapsiyon ti panagturposto ti terminona. Kayatna a sawen...agingga nga isu pay laeng ti timon ti pagilian...dinanto isuko ti kampanyana kontra korapsiyon.

Kinapudnona, adun dagiti ahensiya ti gobyerno ti dinalapus ti kampanyana. Adda 60 Customs officials ken empleado ti kinarintarna ngem adda pay kano 100 ti mabalin a masibak.

Itay kallabes adda lima nga ahensiya ti pinasagidanna para iti panagbalbaliw agsipud ta adda dagiti maaw-awatna a report iti korapsiyon.

Iti praktikal a panangarisit...maymaysa ti tema ti addang ni President Duterte: amin a samben wenno riper iti pagnaan dagiti naitani a programana...rumbeng a mawaknitan.

Madalapus ti madalapus nga awan sansantuenna. Ti kaudian a daldalusanna ket ti PCSO nangruna iti STL.

Ta kas report, adda kano dagiti retirado ken aktibo a kameng ti AFP ken PNP ti nakaala kadagiti gaming franchise. Kunada ngarud...ti korapsiyon iti agdama ket saanen a basta-basta “canser” ta saanen a tumalab ti pa-“chemo-chemo”.

Kasapulan ti mas nadagdagsen a pannusa tapno mapuntil ti sara dagiti korap.

Adda pay ngarud pasagid nga angaw (joke) ni Digong itay nabiit: nga imbes kano nga agkurakotka...inka laengen kadagitay libnus a pang-short time. Adu manen ti nagbusi ti ngangawna iti dayta a pasablog. Ngem ala...ammoyon ti tabas ti dila ni Digong, appomi.

***

Malagipyo pay kadi iti maysa a pasken a nakuna ni President Duterte a naasideg ti riknana kadagiti Marcos agsipud ta adda nagkaddua-anda idi iti dayti sigud nga strongman - Ferdie Marcos?

Malagipyo met siguro ti kasla panangkabigna kenni Sen. Bongbong Marcos iti tengnga dagiti kontrobersiya iti nagbaetanda kenni Vice President Leni.

Iti ababa a pannarita...kasla adda naimulan a bukel a kas batonlagip iti nagbaetan ti Duterte ken Marcos, saan ngata? Ala, no aniaman dayta...panawen laengen ti makaibaga iti kaibatoganna.

Ti ayan ita ti paggagaran dagiti analyst nga isyu ket no ania ti reaksiyon wenno kapanunotan wenno panirigan ni President Duterte iti kaudian a pangeddeng ti Anti-Graft Court a nangibasura iti P102 bilyon a forfeiture case kontra kadagiti Marcos ken croniesna? Urayentayo laengen, apo.

***

Subliakon ti tema ti Karit, pards panggep iti Dengvaxia. Adda mangayat a maaramat manen. Ngem ad-adu nga amang ti kontra.

Kunada...no agpilit latta dagiti mangayat a maisubli ti nasao a bakuna...isuda kano ti umunan nga agpabakuna agraman pamilyada.

Ta iti report ti DOH, addan 622 katao ti natay gapu iti dengue manipud iti 146,062 a nagka-dengue. Ti imasna, kaadduan kadagiti natay ket nabakunaan idi ti Dengvaxia.

Saludsod: no nabakunaanda...apay a saanda a nasalbar? Ngamin , kas pammaneknek dagiti akin-produkto ti nasao a bakuna – dagiti laeng addaanen iti sakit a dengue ti pakaaramatan ti Dengvaxia ngem saan a dagiti dipay nakaptan iti nasao a sakit ta mas delikado.

Dayta ti makagapu no apay a masapsapul amin a nabakunaan a dipay nagsakit iti dengue tapno mamonitor ken masalluadan.

Iti agdama, magmagnan dagiti maisagsagana a kaskaso kontra kadagiti opisyales (idi ken ita) a maitudo a nagbaybay-a gapu iti Dengvaxia. Amen. Adios mi amor, ciao, mabalos.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph